小虎浪遊記

2016 東京快閃5天自由行~Day 2
(巢鴨＞上野＞秋葉原＞幕張outlet＞東京駅)

酒店有包早餐㗎，不過淨係得多士、沙律菜同乳酪，真係唔太啱食，所以就去咗附近嘅餐廳食啦~

出發第一站--巢鴨！對呢度嘅印象只係得紅底橫。。不過其實一直都未親身嚟過，今次就嚟會一會佢啦~搭JR直接喺巢鴨落車！

出咗車站行前啲就見到呢條商店街

見到鴨羅友就即係行到啦~

連郵局都有鴨。。唔知頭先個羅友係咪佢嘅呢🤔🤔

就係呢間紅底横啦！

淨係行咗商店街就走啦。

下一站--上野！大肥話要嚟呢度執平嘢，不過平嘢就執唔到，反而食到嘢~呢個餅即整㗎，熱辣辣，好味！

跟住去秋葉原，大肥話要睇車仔

點知又係無收穫，又係食到嘢，今次係呢間串燒~

再去埋幕張outlet。。。結果都係一樣。。。坐低食個午餐+下午茶好過！

回程經過東京駅，去咗丸之內影燈飾，然後就返池袋食大江户壽b。

經過今日無乜行程嘅行程，我開始覺得購物團其實都唔係好啱我哋，純玩美食團好好多。。

2016 東京快閃5天自由行~Day 1
(羽田空港＞築地市場＞世田谷二手市集＞玄品河豚 )

出發啦~凌晨機嘅好處除咗可以玩足一日外，重有就係可以唔洗同入東涌或者機場返工嘅人迫巴士！我真係唔想上車企到落車囉。。。

上機無耐已經訓著，到差唔多食飛機餐就醒咗。。

其實半夜都唔食開嘢，所以食咗少少就繼續訓~

差唔多到啦！

落機搞掂哂又未夠鐘攞車，係機場行吓先，真係好耐無飛過羽田啦~

差唔多時間就由國際線客運樓嗰度搭無料shuttle 去T2，搵到租車counter就要用枱面個電話打去車公司，等佢哋安排職員過嚟接我哋去攞車。。。真係好轉接！終於攞到車啦，第一個目的地就係築地市場！

大肥就係俾呢間拉麵迷住咗啦。。

大肥努力排隊食拉麵，我就去隔離食魚生飯~

食飽飽，但大肥仲未排到呀。。。等了又等，終於有得食lu

之後行咗個圈，仲食咗玉子，燒帆立貝，再買多個栗子牛角包~

要離開築地啦，下次再嚟應該已經搬咗去新地方啦。。下一個目的地原本係去鎌倉，但大肥係機場嗰時發現到係世田谷區有個好似跳蚤市場咁嘅地方，而咁啱又喺呢兩日開喎，所以就決定先去世田谷二手市集行吓先，因為揸車嗎，入個地址就去到，如果唔係都唔知點搭車去。

就係呢度啦，每年12月15,16日同埋1月15,16日先開，啱哂時間！

雖然無嘢買到，不過都行到唔捨得走呀！大鄉里出城，未嚟過日本嘅市集嗎😁

第三站就係多摩南大沢outlet，行咗個圈就走啦，因為我哋都無乜啱買，睇啱嗰啲又無大肥個碼。。。行完outlet之後已經唔夠時間去鎌倉，下次先再去啦，預備返池袋還車啦！行行吓聞到陣好香嘅麵包味，即刻停車買嚟試吓先！

面頭塊皮好脆，個包好香，但食落無乜味。。

還車之前去便利店買定啲野飲放喺酒店，點知買完出嚟。。小虎仆街了。。。大肥聽到聲即刻跑過嚟，已經太遲啦😭😭😭本來仲諗緊今晚食乜，係仆完之後即刻決定要食河豚補返！😤😤😤

帶住撞瘀咗嘅額頭同擦損咗嘅膝頭，終於返到酒店。。。本來預咗間房會好細，點知又唔錯喎，開到我哋兩個大喼之餘仲有啲位行吓！放低哂啲嘢就去還車，然後去食玄品河豚！

我哋揀咗天樂套餐，乜都有齊！雖然之前係黑門市場食過河豚刺身，但今次係第一次食哂成條河豚，好期待呀🤗

有得食啦~叫咗兩個餐，所以魚生同烤河豚都可以試哂兩款~

好味，不過唔平，食過就好~返酒店前經過小7，買咗杯雪糕做宵夜。

聽日開始真係要行啦，要早啲休息~

2016 東京快閃5天自由行~行程預備篇

2016第一個旅程目的地，就係年半無去過嘅東京，而最主要嘅目的就係食，喪食，同埋係咁食!

機票:
買嗰時本來有睇過廉航㗎，但後來喺ANA Sky Holiday見到有特價嘢喎，買package比起廉航加酒店都係差唔多價錢，咁識揀嘅都知點揀啦，所以就打咗去縱橫遊買ANA嘅package啦！（其實本來係打去另一間㗎，但我問咗兩句之後嗰個Staff已經好似唔想睬我咁，所以咪打去縱橫遊問囉，又咁啱縱橫遊個小姐勁nice喎，咁就即刻扑搥買啦！）

香港 > 羽田　NH840　00:40-05:30
成田 > 香港　NH811　18:30-22:40

咁就可以玩盡5日啦~小虎真係好鐘意搭凌晨機！！！

酒店:
喺package裡面嗰幾間酒店裡面揀咗住池袋嘅Hotel Star Plaza，因為比起其他呢間係最平，又包早餐又近車站，自由行嗎，梗係要搵近車站架啦 !

本身package包咗兩晚，咁我哋就再加2晚，唔駛搬酒店~

Package + Tax +2晚酒店=$8,680/2人，比起上次係JAL買大阪package平好多。。。不過上次係公眾假期出發，今次就平日出發~

行程:
淨係留喺東京其實都無乜計劃過行程，只喺有幾個地方必定要去，就係大肥好掛住嘅築地拉麵同埋去中野睇車仔，而小虎就想睇日本燈飾同埋食河豚

搞掂哂就預備15號出發啦！

------------------------------------
返到香港啦。。。今次原本想第一日去鎌倉同江之島嗰邊，所以租咗一日車，點知大肥臨出發嗰日搵到有個市集啱啱喺我地出發嗰日開，咁咪打算去咗市集先啦。。。當然，旅行嘅時間過得太快啦，最後都係唔夠時間去鎌倉同江之島，無所謂啦，下次再去過！到旅程第三日竟然遇到東京都落雪，真係未試過（不過其實都好少天冷去東京），好彩預咗會涷有帶羽絨啫！

第1日　香港 >羽田取車 > 築地 > 世田谷二手市集 > 多摩南大沢outlet
第2日　巢鴨 > 上野 > 秋葉原 > 幕張outlet > 東京駅
第3日　藤不不二雄博物館 > 中野 > 原宿 > 涉谷 > 汐留燈飾
第4日　靖國神社 > 東京鐵塔 > 月島 > 晴空塔 > 淺草
第5日　酒酒井outlet > 成田 > 香港

經過今次自由行，大肥話以後都唔會再咁行，一定要自駕喎。。。其實上次去東京都係自由行吖，估唔到老咗年半，體力差咁遠囉。。。