上機無耐就派飛機餐啦。。以前國泰凌晨機嘅飛機餐好似無咁簡單架🤔
食左舊muffin就繼續訓，話咁快就到大阪lu，好多架桃子呀！
落機先去會合埋另一位戰友~Sienta，架車4人坐幾好，唔迫又夠位放喼，最重要係P2車，比起正統七人車平好多~不過今次架車好污糟，車身好多撻漬，搞到check嗰時都唔知係花左定只係污糟左。。
坐定定就出發去第一個目的地，三井神户Outlet！
唔知係咪因為假期呢，露天都擺左好多檔，之前嚟都未見過嘅
又見明石大橋，等陣就係行過呢度去淡路島啦！
行哂大肥嘅目標後，正喺度等圈叔圈姨時，就見到outlet必備嘅可麗餅店呢！小虎當然要去會一會佢~
出發去下一個目的地啦~淡路島牧場！途中經過喺outlet見到嘅明石海峽大橋
中途喺淡路島嘅道之駅停一停。。
仲有馬肉造嘅腸仔，不過大肥話唔可以食馬。。
呢度當然都可以影到明石海峽大橋啦！
如果唔係趕住去牧場，今日午餐應該會喺呢個道之駅解決🤔不過其實由呢度去牧場，都好快就到啦~
咁趕住嚟牧場，當然唔係為咗體驗啲乜，其實只係為咗食淡路牛啫😁
味道幾好，不過肉質就一般啦，試過就好！食飽飽繼續行程，下一站~渦之道！由淡路島過去徳島，會經過鳴門大橋！
落橋轉個圈就到展望台，可以望到整條大橋
之後去到渦之道，睇睇時間，今日睇漩渦嘅最好時間已經過哂啦，不過一場嚟到都出去行吓啦！
真係半個漩渦都無。。
再去千疊敷展望台，睇唔到漩渦就影多兩張鳴門大橋啦！
跟住呢，就先返酒店放低啲行李同休息一吓，然後再出發去隔離SOGO。。買宵夜！呢間酒店真係好方便，喺正徳島駅隔離，附近又有得shopping，間房又夠大，兩個人開哂兩個大喼都唔覺迫，而且仲要好抵住，喺Agoda book兩間房都只係12xx！
買齊宵夜就出發去圈叔慶生宴~海女料理！仲記得出發前睇到有旅遊節目介紹呢個料理，好鐘意食海鮮嘅小虎已經即刻搵資料一定要嚟試！初時都擔心咁晏去到會無位㗎，不過好好彩呀，一去到唔駛等就已經可以即刻入座✌🏻️
套餐有3款，我哋揀咗中等價錢嗰款，比起最貴嗰隻應該係少隻燒龍蝦😋
成餐飯都有位海女幫我哋燒海鮮同剝殻，先食冷琵琶蝦做頭盤，然後再有龍蝦刺身，蝦刺，鮑魚刺身。。。
之後就係生猛海鮮！全部都係活生生攞去燒，唔怪得之叫殘酷燒啦。。🙈🙈
其中有個驚喜位，話説海女小姐一開始剝蝦刺嗰時將個蝦頭放左落爐，再叫我哋將食剩嘅蝦尾放埋上去，燒咗好耐好耐。。佢無端端將蝦頭蝦尾夾俾我叫我食喎，咁我當然有少少猶豫啦，不過既然佢叫得我食，一定唔會跣我嘅，咁我咪一口咬落去囉。。嘩！不得之了，好很香呢，好味！
本來個餐都食到七七八八，然後又心思思想食我哋個餐無包嘅燒龍蝦喎。。話哂圈叔生日，一於叫多兩隻試下佢啦！睇餐牌以為二千円一隻，後來海女小姐話原來計大細嘅。咁就搵咗兩隻三千円嘅我哋試啦！
新鮮嘢真係唔同啲，真係好好味㗎！跟住重有白飯，龍蝦頭味噌湯同蜜瓜！
好滿足嘅一餐，埋單四萬幾円，不過如果喺香港呢個價錢都未必食到啦~
返到酒店抖咗陣，夜啲就食埋之前喺SOGO買嘅宵夜~
飽飽就要休息啦，今日凌晨機好眼訓啦，又要預備聽日去祖谷呢~
