2017 新年台北3天快閃團 ~ 行程

以為初一去機場會好多人，所以特登早啲到，諗住預多啲時間排隊嗎~點知去到機場又唔係咁多人噃，仲可以慢慢嘆埋餐茶添~

～～第一日～～
今次好好彩咁唔似上次飛曼谷咁delay，去到閘口班機已經喺度啦~

準時上機~好快就有飛機餐食~

好耐無去過台北，好似未訓過就差唔多要落機啦。。。

 落咗機，等咗成個鐘先入到境。。。人又多，關員做嘢又有點慢，又要掃指模，又唔易掃到。。。最後搞咗個半鐘先去到搭巴士返酒店。今次住君悅可以搭1960線直接到酒店門口落車，好方便呢~上車放咗行李仲會俾返個行李證做識別~

搭咗個幾鐘車先到，返到去放低行李又即刻出發去搵食~酒店隔離就係101啦，仲有燈飾添~

嚟之前已經打算去高記食小籠包，因為虎爸太傳統啦，唔係咩都啱食，而小籠包呢啲佢就最鐘意。不過要4人先可以訂枱，所以過黎踫吓運氣，希望唔駛等好耐啦~幸運地，都要排隊等，但係等咗10分鐘左右就已經有位啦~我地又喺等位嗰時諗好哂食乜，所以一坐低就叫得~

叫咗好多嘢食呀~初一嗎~要豐衣足食呢!

飽飽就去士林夜市啦~一出車站聞到好香好香，原來喺粟米燒，即刻買返包食吓先~估唔到又幾好味喎~

 

之後喺士林夜市因為人多車多攤檔多，所以都無影到相，淨係行咗陣買咗份臭豆腐就返酒店啦~

～～第二日～～
今次再住君悅嘅目的就係為咗呢度嘅早早，仲記得十年嚟嗰時個早早真係好豐富架~而今時今日。。。都豐富，不過比起之前就遜色咗少少啦，但都好滿足呢~因為都仲有煙三文魚呀！仲要好啱味添~

 

仲有一系列嘅包包~

大火腿

仲有其他好多熱盤，不過就無咗以前嘅燒牛扒。。。 另外有好大樽啫喱豆，不過似乎要嚟裝飾嘅，而賀年糖果就真係可以食啦~

今日包咗車9點出發，食飽早早未夠鐘就周圍逛吓~酒店大堂有棵大桃花~

早上嘅101~

8:50分包車阿姨就到咗酒店接我哋啦~今日嘅行程有菁桐，十分，基隆同野柳！一上車包車阿姨就同我哋先傾好行程，然後就出發lu~第一站係菁桐！一行入老街就見到好多許願竹筒，再入少少就見到成日喺旅遊書見到嗰個青面站長~

沿路行就到菁桐車站~

度度都見到好多許願竹筒呀~不過我哋無入鄉隨俗。。。

無預期中咁多人，寧靜~

行咗個圈就出發去十分~之前嚟過兩次，都未見過有咁多人嘅。。不過如果唔係虎爸虎媽未嚟過，其實今次都唔會再嚟呢度。。。

喺十分車站到此一遊後，就去小虎都未去過嘅十分大瀑布啦~包車阿姨話呢度好多負離子，叫我索多幾啖先走喎，不過我已經熱到氣都唞唔到呢。。。沿途風景都唔錯架，不過開始見到人潮lu。。。

沿路行。。其實都唔知邊度有瀑布，點知行行就聽到好大嘅水聲，即刻跑返轉頭先知原來瀑布喺我後面。。。 巧大巧靚呢~

跟住就去基隆廟口夜市食午飯~本來行程係今晚先去嘅，不過包車阿姨話夜晚好多人，而且唔順路，問我哋會唔會改中午去，咁可以避開吓人潮喎~其實都係去行吓，感受吓啫，去先去後都無乜所謂呢~

 

真係好多人，隨便揀檔食魯肉飯嘅~20蚊台幣一碗，好抵食~

去到野柳啦~好多人呀！！！

買飛入場都排長龍。。。最後決定去隔離特產街行吓

然後偷偷地喺出面影張相。。。人山人海到呢。。。下次淡季先再同虎媽嚟過啦~

跟住就返市區啦。。去咗家樂福買啲嘢，然後再去李錦利買八仙果，跟住返酒店休息吓，又再出動去食啦~本來想去鼎泰豐嘅，不過要等2個半鐘先有位。。。咁就隨便去隔離food court食吧~

然後說虎爸虎媽就返酒店休息，我就繼續出發去西門町買好想食嘅阿宗麵線~不過又係要排隊呢，好彩好快就排到。

又過咗一日啦~

～～第三日～～
今日食飽早早之後就同虎爸去佢成日都話要搭嘅貓空纜車~而虎媽就係酒店休息。。。

聽咗尋日包車阿姨話，今日9點左右就到啦~真係唔駛排隊呀！

 

坐咗20分鐘左右就到貓空站~

其實今日天氣唔太好，毛毛雨又大霧，所以行個圈就回程啦！返酒店前去買大肥鐘意嘅雞蛋布丁~之後搭捷運返酒店接虎媽一齊食飯~如果唔係咁大霧就可以上101觀景台啦。。。酒店就喺隔離，好近呢~

接咗虎媽後就去新光三越買手信。。。好有過年氣氛呢~

之後再去food court食飯，估唔到啲嘢好好味呀！

 

出發去機場啦，酒店門口上車

去到機場買埋麻糬就寄行李等上機啦~


飛機餐有魯肉飯~

 

返到啦~

 

3日話咁快就過lu~下次要再去！

2017 新年台北3天快閃團 ~ 預備篇

喺有記憶以黎都好似未試過唔喺香港過新年。。。經過咗黑暗嘅2016年後，今年為咗避年。。。。。。 決定離開香港去台灣走一轉！

本來今次打算去彩虹眷村同清境架，但又唔識路喎，上網睇咗好多資料都唔明（應該睇日本嘢先睇得入腦），加上同埋虎爸虎媽一齊出發，唔可以太趕，改去台北住好啲hea吓就算啦。。。

今次Package又係喺Expedia度book，計過散買同睇過其他，始終Expedia都係平啲，而且佢哋熱線嘅客戶服務都唔錯，所以呢幾次都係用佢！不過雖然要避年，但初一都必定要做件重要嘅事先可以出發，所以就揀咗華航下午機出發，初三夜機返~

CI 910　14:00 - 15:50
CI 927　19:10 - 21:15
 
酒店就揀咗住君悅，仲記得虎爸虎媽十二年前第一次搭飛機，就係去台北住君悅，虎媽到依家都仲記得酒店個自助早有幾好~雖然依家唔知有無變，但都想去會吓佢呢！

行程方面以hea為主，不過會喺初二包一日車，同虎媽去吓野柳同十分！但過年包車好貴呀😱，不過都無法啦，始終同虎爸虎媽去旅行都要以舒適為主嘅。。。

預備出發啦~大肥，唔好掛住我啦！！😂😂

2016 聖誕曼谷3天自由行~行程

同上兩次去曼谷一樣，出發前先黎病，仲要又係胃痛！！！臨上機前都要睇埋醫生先，即係今次又食唔到好野啦。。。大肥，我覺得曼谷真係唔太適合我，有啲相沖嘅感覺。。。

而且呢幾日其實都好熱，第1日喺水上市場，熱到部電話都好似要爆咁。。大肥都熱到無胃口食飯，連行都唔想，所以之後嗰2日行程都係行商場多。。仲記得上年3月嚟都無咁熱，所以先會喺12月再嚟。。


～～第一日～～

出發去機場時先收到個SMS話班機要到 01:15 先飛。。。既然出咗發，咁就照樣早啲入機場等下啦

等了又等，等了又等。。。到 01:00 都唔見話可以登機都知道唔係咁簡單。果然，又再延遲到 02:50 先可以登機。不過無法啦，航空公司話因為機件故障，咁安全啲都好嘅。反正我食咗葯又好好訓，攤喺度都已經訓得著。。。不過就係覺得嘥咗晚酒店同約咗嘅酒店車囉。。

終於可以上機啦，仲改咗去對面閘口，上機又繼續大覺訓。。。記得空姐有派餐肉包，不過都無要到嚟食啦。。。

落機即係攞行李趕出機場，因為約咗酒店車，要快啲上車返酒店補眠，食早早，再出發今日嘅一天包車遊。

其實酒店嘅自助早早都唔錯架，不過無乜胃口，食唔到太多。。。準時9點鐘，司機已機到咗酒店，相認之後就出發啦~ 第一站去美功鐵道市場！沿路醒吓訓吓咁。。一時就塞車，一時又見司機開到120km。。原來喺 11:15 會有火車入站，佢想趕到去等我哋睇到呀！最後我哋喺 11:10 就到咗鐵道市場啦~

啱啱好行前少少就見到架火車黎緊啦！去到已經有好多人喺度等，所以都影唔到靚相，不過架火車真係行得好近，好緊張呢~

臨落車前司機大哥仲俾我哋睇咗個時間表，火車會喺 11:30 開出，即係話我哋只要等多3個字就可以再近距離睇火車啦~咁當然喺附近行吓先啦！其實呢度就係一個街市，不過似乎遊客多過本地人。。。

好多魚檔架，啲魚仲好大條添。。

呢個好似涼粉，好想買桶試呀。

 

我哋行過時，呢個魷魚檔超級多人排隊囉，到返轉頭再睇又似乎無特別吖。

夠鐘啦~啲檔販話咁快就收起哂啲帳蓬俾火車過，我哋都企到個好位影到相啦~

Bye Bye 火車~

約返司機大哥出發去下個景點，佢仲帶我哋入車站行吓。

然後去河邊影相

 

途經椰子樹農場，仲帶咗我哋去購物添。。。椰糖唔啱我口味，不過椰子lotion就幾好用，所以都買咗枝，臨走司機大哥仲請我哋飲椰青~

跟住去到丹能嫩朵水上市場，之前已經book埋坐手搖船，雖然無蓬遮蔭，不過船家都借頂草帽俾我哋。。。好好嘅體驗嚟嘅~

初初出發時大肥仲覺得同佢想像中有出入，點知一轉到入去水上市場，根本就完全同想像嘅一模一樣，超級熱鬧吖！

 

好多野食賣，樣樣都好想試。。。不過可惜無胃口。。。

遊完船河又 出發，差啲忘記介紹，就係呢架車今日載我哋周圍去啦~辛苦哂！

下一站去唐人街食晏，好似塞咗成3個鐘先到

 

飽飽之後本來最後一站係去火車夜市，但因為架車只係包左10個鐘，而又塞車塞得好勁，所以最後改咗去水門對面個新夜市，而我哋都喺呢度自己返酒店，唔駛司機大哥等！今日辛苦哂你啦~

行完夜市，之後去Super Rich換錢，今次匯率有4.56，好似高過上次黎噃~跟住再去Big C入貨，然後上樓上foodcourt買咗啲野返酒店食，休息一吓又出發啦，目的地喺Siam Centre嘅 Center Point Massage~

酒店出面嘅燈飾巧靚呀~

 Central World出面都有，不過好多人，喺天橋影就好。。

按完就返酒店啦~今日真係玩到盡，好攰呀!


～～第二日～～
食飽早早就先去酒店對面Amarin Plaza小虎好鐘意食嘅肉鬆蝦片，雖然話香港都有得賣，但始終好似無喺泰國買嘅咁好食。。之後就搭車去翟道翟。天氣真係太熱，熱得好緊要，熱到要溶咁。。。

行咗一個圈都無就搭車去食399銖任食燒海鮮。出發前見有介紹就好想黎試啦~不過出咗MRT仲要行一段路。。。

 

店員知道我哋香港人，仲攞咗中文版嘅點菜紙俾我哋 

 

有啲海鮮要點先有，有點就可以自己夾。。。啲肉都可以，但海鮮就感覺麻麻。如果俾我再揀，我會去返King Kong，雖然無咁多海鮮可以揀，但質數好好多。

飽飽就搭車返酒店，打算抖抖就去火車夜市同Termianl 21。點知返到去仲訓著咗。。。好彩大肥知醒叫我起身啫。。。

去到火車夜市行咗陣，見到喺夜市竟然有刺身賣，而且唔係放喺雪櫃，啲刺身只係放喺啲冰上面。。可能小虎孤陋寡聞，但今次真係大開眼界。。。

行咗個圈就去Terminal 21個foodcourt食晚飯，一碟炒河只係25銖。。會唔會太平呀！

飽飽就去買埋小老闆紫菜，之後就返酒店啦~

 

放低哂啲野之後走咗去水門嗰邊行夜市，買啲宵夜返酒店食。路經Central World。。。

滿足嘅一天，熱到虛脫嘅一天。。。


～～第三日～～
尋晚問咗酒店可唔可以遲啲先check out，本來佢哋話啲booking好full，跟住又叫我join member，話join咗之後可以遲check out喎。。。填個email address就得，咁就入咗會啦~

食飽早早後就去咗大肥同事介紹嘅禪massage做咗個3個鐘嘅package，巧舒服呢~之後返酒店執好行李，休息一下就check out出發啦~行程就係去附近行商場~

午餐打算去Siam Centre食膽固醇飯，不過大肥話想食鐵板燒，所就去左膽固醇飯隔離啦~叫咗兩個餐，好味~

要返酒店攞行李去機場啦~本來話由酒店搭的士去機場要500銖，後來酒店職員幫我哋搵到架400銖咋，真好~

回程無Delay啦~準時上機！

 

Bye Bye Bangkok~ 希望下次唔好再病住嚟啦~

飛機餐~

熱到暈嘅旅行，不過有大肥一齊去就夠滿足啦~大肥下次要再帶我去旅行呀！

2016 聖誕曼谷3天自由行~預備篇

因為怕人多，又唔想俾特別貴嘅價錢，所以好多年無試過紅日去旅行啦。。。不過大肥成日嘈住要去曼谷揼骨，而我又想買好多好多好多零食，就係咁促成咗我哋2016年嘅最後一個旅程~

睇嚟又睇去，搵咗好耐都未決定到邊日來回嘅組合最平最抵玩，但經過半島同嗰間19水門5星之後，已經知道曼谷酒店真係唔可以貪平，所以一開始大肥就話想豪多次，試吓住洲際。咁本來上Expedia見到搭香港Airline住洲際包早餐要8千蚊左右時都打算扑搥，點知搞極都book唔到，就算揀咗包早餐嘅房，去到俾錢嗰版又跳返去淨房，搞咗好耐都唔得，最後直接打去問，得出嚟嘅結果係，8千係淨房，如果包早餐要9千5。。。咁又要考慮吓先啦~

喺loop咗好多好多次zuji，Expedia，Airasia，泰航........終於都係揀返經Expedia book 香港Airline + Holiday Inn 嘅Package，23號晚收工就出發，26號晚回程，酒店就大家同集團又係左右隔離，應該唔會太差嘅~重點係比洲際平2千大元，仲包早餐添~早餐真係好緊要架~

HX 761　23:55 - 01:50
HX 766　20:05 - 23:55

成套package盛惠$7,475，紅日旅行，呢個價錢都唔算太過份啦~不過Book嗰時其實都心理唔平衡，買4日機票但得3日，平時我咁鐘意搭凌晨機都係為咗玩盡佢啫。。。

而且book呢班機都有個大問題，凌晨2點落機應該點去酒店？機鐵尾班車晨早就開走咗，淨返的士可以搭，但一直對曼谷嘅的士都無乜信心，而且又怕夜晚晚先俾佢哋兜路遊花園。。。所以最後都係考慮最穩陣嘅途徑－酒店接送車！來回兩三個Email已經confirm好哂，由機場去酒店單程要1,500bath，係就係貴啲，但上車可以放心訓其實都OK啦~

今次大肥話想安排個水上市場同鐵道市場去吓，希望個行程可以充實返啲喎~但懶得搭完BTS又要搭VAN咁轉黎轉去，所以就喺KKDay度book咗架車，去哂啲偏遠地方啦~不過包車包埋水上市場隻手搖船都唔平。。。

好啦~book好哂啲嘢就等23號出發lu~