2015 函館、富良野、船長之家9天自駕遊~Day 9
(二条市場＞新千歲空港)
今日喺札幌嘅時間好少咋，喺酒店食咗早餐就即刻去二条市場再食我愛嘅海膽刺身！ 跟住返酒店攞埋行李就出機場啦。。bye bye Hokkaido~ 飛機餐 喺仁川轉機唔係等好耐咋 杯雪糕好好味！ 北海道仲有好多地方未去呀！大肥，下次要再嚟，我要去知床半島呀！
2015 函館、富良野、船長之家9天自駕遊~Day 9
文章
2015 函館、富良野、船長之家9天自駕遊~Day 8
(夕張＞札幌)
朝早喺酒店食咗早早後出發返札幌！中途會去夕張市，因為團友們打算要大戰夕張密瓜嗎！不過小虎就唔啱食啦。。。 密瓜海😰😰 真係要返札幌啦。。還車前先去Sapporo Factory，不過無收穫。。然後就返酒店放低行李，而大肥同虎哥就去還車。今晚住喺狸小路嘅Richmond，間房好大呀，執行李就啱哂啦！抖咗陣，等埋大肥同虎哥返嚟就去行街啦！先喺狸小路行個圈。。 再去大通公園！成個公園都有好多呢啲作品呀！ 札幌電視塔 時計台 原本想行去車站買芝士撻食㗎，不過行到時計台已經好攰，同埋我哋約咗虎爸虎媽一齊食飯㗎，差唔多時間啦，所以就返轉頭lu，點知行過地下街就俾我發現到芝士撻，即刻買返幾個食吓先~ 大肥話呢幾日食蟹食到怕，所以今晚要去食大阪王將喎😤！ 最後一晚，大肥都知我唔捨得訓啦，所以就陪我去食宵夜😋我哋去咗酒店附近嘅牛乃家食燒肉！ 厚切牛舌超好味！ 食飽飽再行去激安睇吓嘢~之後就返酒店啦。。
2015 函館、富良野、船長之家9天自駕遊~Day 7
(屈斜路湖＞摩周湖＞阿寒湖)
本來今次嚟北海道係想去知床半島㗎，不過可惜時間太少，所以無得去。。所以今日嘅目的地就只係道東三湖！ 船長之家嘅早餐無晚餐咁誇張，不過其實都食唔哂㗎，尋晚嗰餐都未消化完。。。 出發去屈斜路湖，中途有個風景巧靚呢！即刻要大肥停車😁 經過美幌峠，本來以為只係一個普通嘅道之駅，但原來沿住賣店側邊條路行高少少，會有咁好嘅景色㗎！ 影咗好耐先走😓真係要去屈斜路湖啦！嚟到呢度我哋都無掘沙浸腳呀，因為比起喺小樽嗰日嘅寒冬，依度簡直係炎夏。。。 行咗個圈就去摩周湖~見到硫黃山，不過無入去，路過影張相就算！ 到摩周湖啦，將架車泊喺無料駐車場行上去。。之前睇書話呢個係神秘之湖，夏天好多時都會因為大霧而睇唔清個湖。不過沿途都有好天氣，所以應該會睇到嘅！一行到上去，嘩。。不得了，一啲霧都無，清到呢。。。摩周湖實在太靚啦！ 又係食晏嘅時候啦，喺出發去阿寒湖途中見到呢間拉麵店。。 呢度啲餃子好味啲囉😑繼續去阿寒湖，今晚住新阿寒飯店，先返酒店放低行李，然後再出動行街。。 今晚晚餐有自助餐~ 其實個自助餐都幾豐富㗎！不過尋日係船長之家食得太過份，所以今餐唔係食咗好多嘢咋。。。食夠就算啦，返房執行李，預備聽日返札幌啦😩
2015 函館、富良野、船長之家9天自駕遊~Day 6
(旭山動物園＞船長之家)
今日嘅行程好簡單，朝早先去旭山動物園，然後就出發去今次嘅重點--船長之家！因為要留肚今晚食大餐，所以今日都唔可以食太多嘢呢！連早餐都係喺便利店買份三文治食就好啦！ 酒店出發過嚟好快就到lu 好似好大咁噃 個個都巧可愛呢~ 你熱唔熱呀? 點解你唔跳落嚟？ 小虎當然唔少得要去睇老虎啦！ 喺呢度唔係留咗好耐咋，因為由旭川去北見嘅船長之家要成4個鐘車程呢！又係明明google map話2個半鐘嘅車程，喺GPS度就變咗好遙遠呀！！！大肥，辛苦完就有大餐食啦，加油！ 因為驚book唔到，所以喺12月confirm咗出發就已經係網上予約，不過佢哋回覆話要1月先可以予約。。到1月嘅時候約咗2次都無回覆，好彩虎哥搵到朋友直接打過嚟幫我哋book咋，如果唔係可能都住唔到(食唔到)。。。 未夠鐘食飯，去附近行吓先！平時一日食十餐嘅小虎，今日連午餐都無食。。最後都忍唔住要喺便利店買雞扒同雪糕頂肚。。 經過原生花園。。。 返到去，雖然未到晚飯時間，不過啲嘢食已經放咗出嚟，忍唔住偷偷地影張相先！ 開餐啦！比頭先多咗2碗飯同1碟魚生。。 而食到咁上下就會開始繼續上其他嘢食。。一開始覺得呢餐無其他網友講得咁豐盛，但咁諗實在錯得好緊要。。 因為最後我哋全部人都無食到毛蟹而退返俾佢哋，而唔食嘅原因係。。。已經飽到上心口！我同大肥已經盡能力食清枱上嘅嘢，但真係食到頹哂都未食哂。。返到上房要攤咗大半個鐘先可以輕輕郁吓呀！今餐大餐真係好滿足，不枉咁遠水路嚟呢度！