2016 上高地、立山黑部、黑部峽谷自駕10天~Day 3(宮川朝市＞Gattan Go!!＞上高地)

今朝有和式早餐~仲有朴葉味噌，送飯好好味！

出發去第一站--宮川朝市

行行下見到呢間舖，網上話呢舊嘢係富山名物，咁我梗係買黎試下啦！其實就好似一舊用蛋白造，又落左好多糖嘅棉花糖，不過個面係脆嘅。。唔。。試過就好！

 

之後買左杯焦糖布甸，巧香滑呢！

離開朝市，見時間仲早，諗住去閃閃app介紹附近嗰間賣土特產嘅舖頭行下啦，點知兜黎兜去都唔見，原來間舖頭已經變左個大超市。。算啦！直接去今日第二個行程--奧飛驒踩鐵道單車 Gattan Go!! ，出發前已經send咗email去book，揀左12點嗰程，佢地仲好快就confirm咗我個booking添，真係好有效率~

去到奧飛驒溫泉駅就係鐵道單車嘅起點啦！

出發前會有個日文嘅briefing，唔識聽唔緊要，職員會俾份中文嘅注意事項我哋睇。

呢2架就係我哋架單車啦~戴好頭盔，等叫名就可以上車出發！

小虎同大肥車住虎爸虎媽，一齊踏上呢條全長2.9公里嘅舊神岡鐵道，去程因為係落斜，踩起上黎其實都好輕鬆，不過小虎平衡力差啲，連行平路都會pk，所以完全唔敢鬆手影相😓呢個重任就交俾大肥啦！

沿途啲風景都好靚架，係過隧道就涼啲。。

話咁快就踩到終點，等職員將架車掉頭就可以踩返轉頭啦！

回程要踩上斜，好攰呀！雖然好攰，但其實好好玩架，旅行就係要體驗啲未試過嘅嘢呢，就算係山長水遠搭飛機黎，就算自己屋企有單車，我都覺得呢度係好值得嚟㗎！

踩得咁辛苦，去下一站之前，一定要搵啲嘢食先得！路經有個道之駅就即刻走左入去啦。呢間餐廳除左牛同雞，其實仲有好多嘢食架，不過我哋睇唔明咋。。所以就簡單啲叫呢2樣啦！

呢個就係雞飯啦，好多汁，唔錯！

食飽就起程去今個旅程嘅第一個重點行程--上高地！因為私家車唔可以進入上高地，所以我哋將架車泊左喺平湯嘅あかんだな駐車場，然後就搭巴士入去啦！

我同大肥仲有虎爸係大正池落車，慢慢行入去，其他人就直接去到總站，即係河童橋先落車，而今晚就住係河童橋隔離嘅白樺莊！

落車就見到大正池啦。。巧靚~

 一路行其實都好寧靜，人唔多

穗高連峰

仲有大聖爺！！比起馬騮山嗰啲，佢地真係好溫馴~

行到河童橋啦~

 

酒店就喺對面~

返上房放低啲嘢，即刻去樓下買返個栗子蛋糕食吓補充返啲體力先！

抖左陣就食晚飯，今晚都係一泊兩食！晚餐有啲意菜feel~

碟碟菜都細細份，好彩今晚有宵夜~

又過左一日啦，又要預備迎接聽日嘅行程！

2016 上高地、立山黑部、黑部峽谷自駕10天~Day 2(土岐Outlet＞高山老街＞高山二人靜白雲)

酒店無包早餐，所以我地加左錢，係酒店食埋早餐先出發。都有好多款嘢食架，擺位就同門口嗰幅圖一樣，其中最好味就係啲蒟蒻 (其實係因為我好鐘意食)，唔知點解，係香港買極都買唔返咁煙韌嘅。。。 

食飽早餐，執好行李就出發去今日嘅第一站--土岐outlet！本來打算今日係去高山同飛驒古川嘅，不過諗住都順路，又諗住尾二嗰日可以早啲返到名古屋，所以就今日去左outlet先。。

經過尋日嘅下雨天，今日終於見到藍天白雲啦！Yeah~~~

其實對我黎講，個個outlet都大同小異，購物嘅意慾奇低，反而購食物就好有興趣啦！所以每次只係同大肥去完nike, adidas, puma，就當行左個outlet。。

係呢個outlet最大嘅印象就係食左個好好味嘅章魚燒呢！又係嗰句，唔知點解係香港食極都食唔到咁好味嘅！而呢個章魚燒就係今日嘅午餐啦，因為要留肚去高山食飛驒牛呢！😋😋

離開outlet就出發去第二站--高山老街(上三之町)！嚟呢度嘅目的除左觀光外，最重要就係食飛驒牛串，飛驒牛包同飛驒牛壽司。

一泊好車，行過第一檔串燒已經即刻買黎試，呢檔一串要450円，幾香，幾好味！

再行第二檔，又買多一串，呢檔一串500円，幾香，好味過第一檔！

行到第三檔，試左一串好似係700円嘅。。不得了，之前嗰2串完全無得比！即刻加碼試多串1000円嘅。。我終於知道咩叫入口即溶，就算之前係神户食神户牛都無試過呢個味道呢！

跟住去食壽司。。好多人排隊呀！！！因為留係呢度嘅時間唔多，而壽司又好似整得好慢，所以排左一陣就放棄左啦。。。

好唔捨得咁離開左壽司長龍，周圍影左陣相，就出發去超市買宵夜啦！

開車無耐。。呀！我未食飛驒牛肉包呀！睇下時間，唉。。唯有下次再黎食過啦😩

買完宵夜就返酒店，今晚住高山二人靜白雲，一泊兩食。因為我地住2樓，旅館無電梯嘅，所以要搬啲行李上房，好彩今日仲係第二日，行李唔重，樓梯唔多啫！

攤抖左一陣，又出動去附近影相。

 

夠鐘食飯啦，旅館安排左我地喺間房入面食，一開門，點解無櫈架？我都叫做學過幾個月瑜珈，坐一陣地下無乜問題，不過就考起虎哥同大肥啦😂！呢餐都好豐富呀，啲牛肉都好好味，除左張相嗰啲之外，之後仲上左3樣嘢食，其中一個係茶碗蒸。而且仲有飯後品添~~

食飽晚飯，浸完溫泉，食埋宵夜就訓啦，預備迎接第3日嘅行程！

2016 上高地、立山黑部、黑部峽谷自駕10天~Day 1(中部國際機場＞Mystays名古屋榮酒店)

香港 > 名古屋

終於出發啦！！！香港express轉營做廉航之後都無搭過，唔知係咪真係咁差呢？

準時上機！細細架飛機，要搭車出去行樓梯上機~

好快好快，3個半鐘左右就到左中部國際機場，唔止無delay，仲早左成半個鐘到添！架機啲位又唔算頂腳喎，其實都幾好坐吖！(如果買到更加平嘅機票應該感覺會更好😂😂)

落機第一件事就係去Toyota迎接我地嚟緊呢9日既戰友。由機場出發去攞車好方便，唔駛搭接駁車去。虎哥一早已經喺Toyota book好哂2架車，所以我地只係交個passport同國際牌，俾錢買CEP咁就可以出發啦！(張相係第二日補影架)

名古屋比香港涼好多，啱哂超怕熱嘅小虎一家！不過沿路去市區都落住雨。。哎

第一站酒店！今晚住喺榮駅附近嘅Mystays，所以返去酒店放低架車同行李先出去搵食！

一直都打算今晚就去蓬萊軒食鰻魚飯，所以朝住松坂屋進發！點知啲雨一直都無停過，開遮又唔係，唔開遮又唔係，而且一行人連晏晝嗰餐都無食到，所以去到松坂屋前2個路口嘅一個商場時，見到有好多餐廳就入左去，最後小虎就同虎媽仲有大肥一齊去左另一間食鰻魚飯嘅舖頭！至於其他人呢。。就去左隔離食另一名物---矢場豬扒！

虎媽同大肥揀左4個前菜加鰻魚飯定食，而我就要左個鰻魚飯再加燒鰻魚肝！4個前菜有。。。

沙律，虎媽話好食，不過我唔食菜所以對佢無興趣!

明太子豆腐

鰻魚

明太子蛋卷

呢個係另外叫嘅燒鰻魚肝。。。好香，仲好甘添。。。

最後當然係主菜上場啦！呢碗飯可以有3個食法，包括齋食，茶漬，仲有加葱加wasabi咁食，我就鐘意茶漬啦！

定食仲包一球雪糕做甜品，不過我除左抺茶同雲呢嗱，完全聽唔明最後一款係咩，所以就只係揀左呢兩款啦！

之前趕住食飯都無睇到門口原來有人整緊鰻魚喎！

就係呢間啦！後來係閃閃書個app搵到，原來有介紹過架！

好滿足咁食飽一餐後就去行下街，見到著左燈嘅名古屋電視塔，跟住去驚安殿堂行左個圈就返酒店啦。咁就過左一日，晏晝機啲時間真係好唔見駛！

2016 上高地、立山黑部、黑部峽谷自駕10天~行程預備篇

由上年6月開始話要去立山黑部睇雪牆，到今年5月終於成行啦👏🏻！

因為係9人一齊出遊，虎哥擔心乜都安排唔切，所以早喺上年12月已經訂左機票，1月已經book好酒店...而行程，就等小虎黎啦！！既然未出發，先講下今次既預備情況先！

機票:
今次揀左香港express去名古屋既機票，時間本來都幾好，原本係上晝9點20分出發，點知突然係3月收到個email，話去程班機改左做中午12點先出發，搞到連本來第1日係名古屋僅餘嘅行程都無埋，雖然回程嗰日都改遲左55分鐘先起飛，但係第10日嘅心情又點可能同第1日一樣呢。。。

去程UO584 12:00-17:00
回程UO657 15:40-18:45

機票+劃位+行李，一個人$2,703，都算幾抵啦！

酒店:
酒店主要都係揀啲有大浴場，有自助餐同一泊兩食嘅，當然最要就係要夠抵住啦！最後就左揀咗.....
1. 名古屋Mystays
2. 高山二人靜白雲
3. 上高地白樺莊
4. 大町落葉松莊
5. 宇奈月格蘭
6. 富山曼藤酒店
7. 金沢Mystays
8. 下呂彩朝樂
9. 名古屋萬寶龍

租車:
今次租左2架Sienta去肩負起9日黎穿縣過市既重任，因為係短短9日𥚃面會經過愛知縣、岐阜縣、長野縣、富山縣同石川縣，講出黎都好有長征feel。。。當然仲要辛苦哂揸車既虎哥同大肥啦！

酒店+租車每人要$6,600，以去日本10日黎講，都唔貴吖！

行程:
今次行程會經過5個縣，x個市。由於大肥對揸長途車有恐懼，所以諗行程嗰時要係navitime逐個路程check行車時間，最終係諗完又改，改完又諗既情況下，暫時諗出以下行程，希望夠時間啦！

第1日　香港 > 名古屋
第2日　名古屋 > 高山 > 飛驒
第3日　高山 > 奧飛驒 > 上高地
第4日　上高地 > 新穗高纜車 > 地獄谷野猿公苑 > 大町
第5日　大町 > 立山黑部 > 宇奈月溫泉
第6日　黑部峽谷 > 魚之站 > 海之駅 > 富山
第7日　富山 > 冰見 > 高岡 > 小矢部Outlet > 金沢
第8日　金沢 > 五箇山 > 白川鄉 > 下呂溫泉
第9日　下呂溫泉 > 馬籠宿 > 土岐Outlet > 名古屋
第10日　名古屋 > 香港

好啦！萬事俱備，只等5月6號出發！

------------------------------------
返到香港啦。。。今個旅程重點嗰兩日都遇著壞天氣，上到立山又出唔到去睇雪牆，去黑部峽谷搭小火車嗰日又落大雨，去地獄谷野猿公苑又因為時間問題變左只係喺松本行街，所以最後實際行程都有啲變動。。

第1日　香港 > 名古屋
第2日　名古屋 > 土岐outlet > 高山
第3日　高山 > 奧飛驒 > 上高地
第4日　上高地 > 新穗高纜車 > 松本市購物 > 大町
第5日　大町 > 立山黑部 > 魚之站 > 海之駅 >宇奈月溫泉
第6日　宇奈月 >小矢部Outlet > 高岡 > 富山
第7日　富山 > 黑部峽谷 > 金沢
第8日　金沢 > 五箇山 > 白川鄉 > 下呂溫泉
第9日　下呂溫泉 > 馬籠宿 > 名古屋
第10日　名古屋 > 香港

趁仲記得，即刻開始寫低啲行程先~