2017 東北夏祭10天自駕遊~行程預備篇

今個旅程完全係為虎爸而設嘅~

每年八月東北都有好多祭典，而每到祭典期間都係一房難求。。。除非唔住返喺嗰區！所以早早就要開始預備啦～今次團友同上次一樣。。六人行～

機票:
明知暑假出發就一定貴啦～之前鵝脾航空做過特價，2千蚊鬆啲都買到，不過虎哥就話NO～再揀就係雲呢拿航空同HK航空啦，如果雲呢拿航空連行李同劃位，分開去程同回程買，比起HK航空平800一個人，6個人出發就差4,800啦！！！咁唯有揀廉航啦。。。。。最後機票每人2,8XX～暑假出發，應該算合理價錢吧🤔🤔。。話時話，咁大個人都好似未試過暑假去旅行。。

JW300　02:00 - 07:25
JW309　21:00 - 01:10

大愛凌晨機✌🏻✌🏻

酒店:
1. 松島大觀莊
2. 花卷溫泉千秋閣
3. 乳頭溫泉休睱村
4. 盛岡格蘭大酒店
5. 青森Super Hotel
6. 秋田 Comfort Hotel
7. 銀山溫泉能登屋
8. 仙台國分町 Smile Hotel
9. 水戶Daiwa Roynet 酒店

由1月買咗機票開始己經不停諗行程，因為屬於一級戰區嘅青森通常都一房難求，而且我哋仲要三房。。。所以一定要早早決定行程同bk酒店！諗住通常都係接受半年前嘅預約，所以2月開始bk酒店，點知2月頭上Japanican一睇，青森嘅房全部無哂，最近要去本八戶。。。

然後唯有上Google Map逐間酒店篤入去搵。。。。當然都係全部無房啦😩😩！唯有本八戶都bk咗先啦。。到2月中，越諗越唔對路。。應該係唔順路先啱！所以本著問吓無妨嘅心態逐間酒店都send個email問一問。。喺青森駅附近嘅哂店全部都問過哂，有好多間都話真係無哂房，還好仲有幾間話未開放預約，其中一間就係SuperHotel，呢間酒店一直都係首選，原因係住呢間酒店只要落樓下就可以睇到今個旅程最重要嘅青森睡魔祭～ SuperHotel喺3月1日晚12點開始可以bk，即係香港時間2月28晚11點就要開始爭房啦！

最後。。好彩。。。喺虎哥虎嫂同小虎一人搶一間嘅情況下，終於以每間25,000yen嘅價錢搶到3間房。。。到11:07再睇嘅時候己經去到呢個地步。。

青森睡魔祭嘅吸引力真係好強好強。。。第二日嘅朝早青森華盛頓酒店都可以預約，本來諗住如果有平啲嘅就轉酒店啦。。點知。。。

比SuperHotel仲要貴。。算啦，bk到己經好好，做人都係唔好貪心。。。

其真除咗青森之外，秋田嘅酒店都係唔易bk！一開始又係喺Google Map逐間篤，得返千秋公園APA有房，每間房要22,xxx yen。。。都要bk咗先啦，遲啲睇吓有無其他平啲先再換啦。。最後4月中喺Japanican度見到Comfort Hotel有房，每間房16,800yen！咁梗係即刻轉啦，今個旅程唔係住靚酒店，但價錢一啲都唔平，慳得少少得少少啦。。。

租車:
今次諗咗好耐買唔買JR Pass上仙台先攞車。。但如果搭新幹線要喺機場出返去再轉車，回程返東京又去唔到銚子嗰邊，所以最後都係決定直接由機場攞車上仙台！之前6個人會租2架車，但其實上仙台路途遙遠，加上凌晨機，大肥一定頂唔住！所以揀咗租Toyota嘅Hiace 10人車，可以6個人一齊坐，虎哥同大肥又可以輪流揸車，咁大家都唔駛咁辛苦啦！

10日車租18x,xxx yen~
 
行程:
今次行程好簡單，就係要喺最少嘅時間內追最多嘅祭，包括盛岡三颯舞、青森睡魔祭、秋田竿燈祭，同埋諗咗好耐之後決定放棄山形花笠祭而改去嘅仙台七夕花火大會！

另外一個目的就係要住銀山温泉☺️☺️不過無雪景唔知會唔會都係咁靚呢～



等咗半年，終於都預備出發啦～