2014 和歌山、京都、伊勢8天自駕遊~Day 4(鈴鹿賽車場＞鳥羽扇芳閣)

本來今日嘅行程好充實架，預計係朝早去大肥好想去嘅鈴鹿賽車場，然後下午去鳥羽水族館。

點知今朝一打開窗。。。落雪呀！！！以為係白色情人節嘅開始，點知。。。

食過酒店早早，照原定計劃去賽車場，沿途見到都係白茫茫一片，尋晚場雪應該都幾大

 

去到賽車場啦~原先大肥係打算去揸吓卡丁車感受吓嘅。。

 點知去到門口，個職員話因為今日太大雪，所以場內乜都無得玩。。咁我哋係度猶豫緊仲買唔買飛入場睇吓記念品嘅時候，個職員竟然同我哋講唔收我哋錢，俾我哋入去賣店睇吓。。日本人真係好好好好好呀！

入到場，當然又係全部雪。
　

好艱難咁行到去賣店，又無收穫。。。大肥，下次再嚟啦！

開始出發去鳥羽，途經道之駅。。都係雪

中途入吓油食吓晏，其實都行咗好耐，因為啲雪變哂冰，啲車都開得好慢。。。終於仲有30分鐘路程左右就到 水族館啦~而呢30分鐘，就成為咗我哋嘅惡夢開端。。。。。。

話說仲有30分鐘就到水族館嘅時候，條路就開始好塞車，塞咗半個鐘左右就去到一個繳費處，但係由於太多積雪，所以過繳費處條路封咗。咁我哋就好自然咁兜另一條差唔多遠嘅路去水族館啦。。就係呢段路。。令到我唔敢再喺落雪天自駕遊。。。。。

其實塞咗半個鐘之後，我哋距離水族館只係淨返15分鐘車程，沿路都好樂觀咁講，如果4點前去到水族館就入場啦，如果唔係就聽日先去，因為今晚住嘅酒店只係同水族館差6分鐘車程，咁如果趕唔切入場就直接返酒店。。。。點知，就係呢短短15分鐘嘅車程，我哋總共塞咗5個鐘。。係足足5個鐘。。喺塞咗個幾鐘之後有諗過唔再入鳥羽而直接返轉頭去京都，而我哋都打咗電話去Japanican，請佢哋幫我問酒店，如果取消今晚住宿要唔要收錢，佢哋都話如果真係取消嘅都唔會收我哋錢，正當我哋考慮緊嘅時候，見到前面啲車又開始郁喎，咁如是者我哋又等。。。其實考慮返唔返京都嘅另一個原因係，頭先入黎條路都好塞，如果上京都一定又會經返頭先入嚟條路，所以最後都係決定再等多陣。。如是者我哋又等咗個幾鐘，今次再無得考慮上京都啦，因為連對頭車都開始塞住，行得好慢啦。。。最後，係夾埋等咗5個鐘之後，終於通到車啦！！！雖然已經好攰，但都唔敢開得太快，因為地下好多冰，而我哋又沿住海邊行，行過一個小彎時仲有啲跣軚添。。5個鐘都係咁等，唔好急於一時啦。大肥都話好彩最後決定換咗雪軚，如果唔係都唔知點。

我哋由3點幾開始塞車，到差唔多8點半先去到酒店。點知去到酒店，個職員竟然話我取消咗今晚間房喎！！！我明明淨係搵Japanican問唔住要唔要錢，Japanican嗰邊覆我時都話無幫我取消喎。。。咁我當然叫酒店直接問Japanican啦，而個職員仲問我哋係咪今晚打算喺度住。。我頂！最後佢哋直接聯絡之後，個職員同我哋講返係佢哋誤會咗。。算啦，你快啲俾間房我就得啦！

今日book咗一泊兩食嘅，我哋一check in個職員已經話9點鐘會有人送餐去房俾我哋。。。都有好多嘢食，仲有龍蝦刺身添

 

我哋2014年嘅情人節就係咁過，我諗幾多年後問返起我都會記得！