2016 四國、小豆島8天自駕遊~Day 2(劍山＞落合集落展望台＞祖谷のかずら橋＞小便小僧)

一覺訓天光~間酒店真係幾舒適！酒店無包早早，尋日checkin時問過，如果加早早嘅每位盛惠1,080円，反正出去食都要錢啦，所以book埋早早吧！不過酒店無餐廳，要去樓下商場嘅餐廳食，其實都好方便啦！但係個早早唔多啱我口味囉。。。。

食飽飽就返房執行李，大肥話要補眠多陣喎。。咁我自己出去行吓啦~

有個市集賣蔬果呢，不過仲凖備中，無謂過去打擾人哋啦

 

本來想一路行去阿波會館，不過有點距離，一來一回應該趕唔切返去，所以改變行程，行咗去上一次嚟嗰時住嘅酒店影張相，睇吓有無唔同嗎~

影完就行返酒店啦，唔知下次再嚟會係幾時呢🤔返到酒店樓下發現，原來條街地面都有阿波舞圖案㗎，果然好出名呀！

八點半凖時出發！今日第一站係去劍山。。由徳島去劍山都有啲車程，咁經過道之駅當然又入吓去啦

見到靚嘅風景當然又要停低影張相啦

入劍山嘅路程，好很多樹。。好很多彎。。

本來GPS話仲有一公里先到劍山，行行吓好難得地見到好多車停喺度喎，再望一望。。原來呢度就係吊車站！差啲行多咗一公里呀！

買好飛就上車lu~

好似搭咗好耐先到終點站

 

懶過隻象嘅小虎當然唔係打算行山啦，嚟呢度目的只係搭大肥恨咗好耐嘅吊車咋！所以隨便行個圈影吓相，就搭返回程啦！
 

上去都唔覺。。回程落山反而有啲刺激感！

出發去下一站之前，當然要醫吓肚先啦，如果唔係好似頭先入嚟條山路咁搵間舖頭都無就真係餓死小虎啦。。。車站附近有幾間舖，就揀呢間啦！

飯團好味，烏冬又好味。。要喺日本搵唔好味嘅嘢真係唔容易！

食飽就出發去下一站~奧祖谷觀光周遊單軌電車！就喺呢個時候先發現山區地方上唔到網，無得搵地址。。好彩之前諗行程時無端端寫低咗呢個地址喎，咁先入到GPS去到咋！不過天意弄人。。。。呢度竟然因為之前打風損毀咗，依家要修復返所以唔開。唉。。。

無法啦，唯有下次再嚟過！😏跟住去落合集落展望台！呢度又係無得入GPS，之前睇網友寫過，沿住去蔓橋條路行，中途就會見到落合集落展望所嘅指示牌，就係咁就去到啦！小虎之前喺網友啲blog見到就好想去啦，今日終於嚟到lu！

所以話呢，如果打算要血拼，千祈唔好同小虎去旅行呀！小虎只係鐘意睇風景，睇一啲香港見唔到嘅嘢咋！

由於山區上唔到網，唯有返酒店搵張地圖，再搵返啲景點先再出發啦！一喺酒店泊低架車，即刻有個叔叔出嚟睇吓我哋有乜要幫手，佢唔止俾咗張有哂景點mapcode嘅資料我，仲鬼咁熱情咁介紹我去一個叫XX溪谷嘅地方。。好嘢！又繼續出發！先去2分鐘車程嘅祖谷のかずら橋~經過蔓橋夢舞台。。

行落少少就見到蔓橋lu

買咗飛就行啦。。呢張係仲未行出橋嗰時影嘅，行咗出去我驚跌鬼咗部機落去唔敢再影啦。

其實，可能對腳太大，所以都算行得穩，不過圈叔圈姨就😏😏今晚食多2粒血壓葯啦！

之後行去琵琶之滝

天色越嚟越差，即刻出發去搵埋小便小僧就返酒店！沿途見到酒店叔叔介紹嘅XX溪谷

嚟到小便小僧呢度已經好落到大雨啦，拿臨落車影兩張相就走啦。。

十零分鐘車程又返到酒店lu~

 

揀呢間酒店係因為俾搭纜車去浸溫泉吸引住，所以返到房洗個面又再出動。。。

就係呢架纜車啦~

好快就到咗山上面，呢度有男湯女湯足湯仲有混浴，大肥當然走咗去混浴啦。。。不過裡面無人陪佢喎~

露天風呂太多蚊啦，所以浸咗一陣就走lu~酒店得大堂先有得上網，趁未夠鐘食飯早啲去上陣先，跟住就喺大堂發現到插滿哂旗嘅地圖，原來呢間酒店有好多香港人住過架~

晚餐時間~最驚喜係嗰條河魚刺身同嗰串年糕豆腐加蒟蒻

  

烏龍茶都有玻璃樽裝，我真係未見過。。。

飽飽再去浸多次溫泉就休息啦~今日最可惜係無宵夜囉。。。