2016 四國、小豆島8天自駕遊~Day 3(西島園芸団地＞ひろめ市場＞祖谷のかずら橋＞四萬十市)

喺酒店食早早，唔駛煩食乜~傳統日本早餐都啱食㗎，樣樣都有少少，可以試多啲嘢~

凖時八點半出發，臨開車前有個職員仲送咗包Japanese Candy俾我哋呀，多謝哂~第一站出發去大步危坐船~

未買船飛前先喺外面影吓相。。尋日落咗場長命雨，搞到今日水流好急，如果上船應該會好似玩激流咁喎。。。。大肥見到仲係咁問我有無嚟錯地方喎😤😤😤梗係無嚟錯啦！玩激流嗰度係吉野川呀！

 

入到去打算落樓下買飛時，咁啱有個姐姐行上嚟，知我哋想坐船，即刻帶我地去櫃檯。。。指俾我哋睇因為增水所以無船坐。。。。

唉。。已經無得坐觀光周遊單軌電車，依家又無得坐大步危遊覽船。。大肥，下次一定要再嚟，順便食多次海女料理😋😋！因為多咗啲時間，所以加插個景點啦~西島園芸団地！記得上一次嚟嗰時路經一個巨峰園，買咗抽靚提子~所以今次決定再路經多次！雖然搵得返個巨峰園，不過就搵唔返上次咁靚嘅提子啦。。。混完吉就走人lu！

幾分鐘車程之後就見到呢舊西瓜，即係表示已經到咗目的地啦~

呢度仲係咁多嘢賣。。咁多花草。。咁多生果。。咁少人。。。。。其實點維持到？！

   

逗留咗一陣又再繼續行程，本來打算先去Aeon買定宵夜，點知行行吓大肥見到間賣運動嘢嘅大舖就又走入去行咗一輪。。跟住睇吓時間，為咗避開lunch time唔好同人逼，咁就改變行程，先去ひろめ市場啦~泊好車之後喺商店街行咗個圈。。

   

喺時候開餐啦，一開始就揀定咗要食明神丸嘅燒鏗魚，不過循例都要行個圈嘅

 

搵好位坐定定就同圈叔一齊去買咗一個醬汁同一個鹽味嘅燒鏗魚套餐，仲啱啱見到佢燒呢~

 

除咗呢2個餐，我哋仲買咗餃子同漢堡扒飯餐添，不過掛住食無影相😓而呢2碟燒鏗魚又唔係好啱我口味。。。名物嘅嘢，試過就好。。飽飽就出發去附近嘅Aeon Mall行個圈，然後就起行去四萬十啦~

GPS顯示由高知市去四萬十市要3個半鐘，明明出發前map神同navitime都係話2個鐘就到㗎。。突然間北海道嗰次長征嘅陰影湧哂上嚟😖大肥努力咁同戰友並肩作戰，中途都只係去咗窪川一個道之駅咋。。。之但係呢個駅名同個樣都好熟，係咪4年前都嚟過呢🤔

繼續趕路，經過有超市喎。。咁梗係必須要入去買定今晚宵夜啦~

仲見到個好靚靚嘅肥pooh蛋糕呀！俾我實唔捨得食。。

終於用咗2個半鐘就已經去到酒店，辛苦大肥啦！因為今晚唔係一泊兩食，所以攞好房放低行李又再出去搵食啦，大肥話想食燒肉喎。沿路入嚟有間燒肉店，好彩頭先睇到個名，即刻上網搵電話先

10分鐘左右就到啦，原來間燒肉店對面有間100円店，咁又入去混吓吉啦

不過今次又混唔哂噃，都叫做買咗幾包蒟蒻！過去食飯lu，燒肉店叫大福

入去之前唔知有放題，都諗咗陣㗎。。以我同大肥嘅食量，唔食放題應該好易破產㗎🤔入到去見到原來有放題呢~仲有2款放題可以揀，最大分別就係食唔食和牛，價錢差1千円左右，有嚴重選擇困嘅小虎自然又心大心細食唔食和牛好啦，點知圈叔好有霸氣講咗一句。。差幾十蚊梗係食和牛啦！。。又好似好有道理噃🤔🤔

 

食飽飽好好味嘅和牛，仲食咗個好好味嘅雪糕。。唔係講笑，呢碗嘢真係好好味，𥚃面仲有舊蕃薯添

返酒店啦，夜啲食飽宵夜又休息啦

咁又過咗一日啦。。。