2016 四國、小豆島8天自駕遊~Day 4(安並水車之里＞岩間沈下橋＞大街道商店街＞道後溫泉)

喺酒店食飽早早就出去附近行個圈先~呢間就係我哋住嘅新皇家飯店四萬十，2間雙人房都只係2萬円~

附近有商店街㗎，不過太早未開囉。。

又係凖時八點半出發，先去尋日經過咗兩次都無入去嘅四萬十物產館

之後跟住GPS行，行咗好多小路。。。終於去到小虎好期待嘅安並水車之里
 

唔知點解。。反正就係好鐘意水車，去到邊度有水車嘅都都要影一餐😁😁今次可以影飽佢lu，不過可惜天陰陰，如果有陽光肯定仲靚~之後就要去四萬十川好出名嘅沈下橋，頭先轉入嚟嗰時都見到有指示牌啦，不過穩陣起見都係跟map神指示👍🏻👍🏻好快好快就到佐田沈下橋啦~真係好窄呀，應該唔夠位俾2架車平排行過。。大肥仲話要專心揸車，叫我唔好嘈喎🙊

行去橋中間睇日本最後一條清流。。。靚！

影夠就繼續出發，目的地係道之駅四萬十，記得有網友講過沿途上去會經過另一條好出名嘅岩間沈下橋，又去搵吓先~

其實沿住四萬十川行都會經過好多沈下橋啦，而且一路行就一路停車影


點影都咁靚

前面又有沈下橋啦，望一望路牌，原來呢條就係岩間沈下橋喎

呢條仲窄過佐田沈下橋呀！

有車經過。。真係啱啱好夠過咋！

繼續出發去四萬十川嘅最後一站，道之駅四萬十！之前睇書見到呢度有栗子醬賣，所以唔順路都特登嚟呢度買返樽，不過其實都係多行左十零分鐘回頭路啫😁

喺呢度再影四萬十川~

買咗栗子醬，栗子蛋糕之外，仲食咗杯好好味嘅栗子雪糕。。我真係好鐘意栗子~

要離開四萬十市啦，下一站向愛媛縣出發~中途經過有間舖頭專賣啲手作仔嘅，我哋仲一次過買咗好多今治產嘅頸巾添~

之後到咗伊予灘SA，大肥話餓到打哂鼓，所以午餐就喺呢度解決啦！

喺呢度可以望到松山市，亦即係我哋嘅目的地
 

本來以為今日好晏先到道後溫泉㗎，但估唔到依家早咗好多嚟到松山市，所以加插個後備景點，就係去大街道商店街啦~泊好車喺附近停車場再行去大街道方向。。

好似有啲冷清噃。。。

地下都有道後溫泉嘅圖案㗎

同大肥行咗一陣就入去三越行個圈，其實係因為見到有北海道美食節啫，我哋仲買咗人形燒添！無法啦，人家原個人形燒咁遞俾我試食，食落又好好味喎，我唔買都唔好意思。。。之後上網搵吓附近有無玩具店，等大肥有啲收穫啦，點知又搵錯地方，最後就行返去銀天街行吓啦

本來打算去超級市場買宵夜㗎，但又心大心細想試雞刺喎，撞啱啲刺身又好似唔太新鮮，咁就叠埋心水返酒店！

去到酒店check in完返房洗個面又出發坐接駁車去溫泉街行吓！我哋喺道後溫泉駅落車。。

隔離就係溫泉街啦，仲有足湯添

沿住溫泉街一路行，一路買，好快就到道後溫泉本館啦~

不過喺呢度就俾班陸客團破壞哂我嘅好心情😡😡其實影相嘅嘢，影完可以讓個位俾人啫，唔駛影完之後，明明見到有其他人等影都賴死唔行開，仲要企正喺人哋前面指手畫腳，擺埋哂啲騎尼樣㗎！大肥仲要話我好咁勞氣，人人都有權影喎。。。佢影相我唔會話佢囉，佢係影完仲企喺人哋部機前面賴死唔走呀！係明知你等影相，佢都要企喺度指手畫腳，睇自己啲相呀！原來連大肥都唔幫我，唔怪得之佢哋都蝦＿我啦😤😤

之後見接駁車時間未到，咁又慢慢行多次溫泉街，返去道後溫泉駅等車啦~放低啲嘢又夠鐘食飯，今晚係一泊兩食，2餐都係自助餐，住一晚都係16,800円2個人，真係好抵！之前喺和歌山同下呂都住過呢個集團嘅，唔錯㗎~

飽飽就去按摩區鬆一鬆，不得不介紹呢張按摩床，初初整嘅時候就好痛，不過慢慢習慣咗就好舒服~我上次喺下呂已經發現佢啦！

鬆哂，攤抖一陣，又諗咗一陣，最後都係決定出去食雞刺做宵夜。。其實想試咗好耐啦，不過無人陪我食，咁啱之前睇旅遊節目就係介紹松山市有間好好味嘅地雞店，咁就出發啦！點知出到酒店門口先知原來落緊大雨呀。。。不過都唔可以打消食雞刺嘅念頭㗎😠跟住GPS行，去到目的地見到招牌，泊好車就行過去。。。但係。。點解。。搵唔到間舖？我同大肥圍住嗰幢大廈來來回回咁行。。頂！門口個招牌細到呢。。再頂！無位呀。。。

正當諗緊去邊食宵夜時，大肥話原來對面嗰間店都有雞刺食呢~就揀呢間啦！


我哋叫咗一份雞刺，仲叫咗個鯛魚鍋添！因為驚如果真係食唔慣雞刺都可以淥熟先食嗎😓呢款雞刺有雞心、雞腎、燒過吓嘅雞、淥過吓嘅雞、當然仲有全生嘅雞啦！我唔客氣啦😋！

其實雞肉就無乜特別，但燒過吓嗰款就有啲韌。。不過雞心同雞腎就好有驚喜，好味👍🏻！鯛魚鍋可以就咁食，唔駛加雞肉啦😁！

好滿足嘅一餐~飽飽就返去休息lu,預備聽日征服金刀比羅宮。。。條樓梯！