2016 四國、小豆島8天自駕遊~Day 6(栗林公園＞小豆島橄欖公園＞醬油館＞素麵館)

加咗酒店早早，去咗樓下商場一間餐廳度食，門面完全唔似有早餐食囉。。。搞到我都搵咗陣😓

今日第一站係栗林公園，不過好似天陰陰噃。。

酒店出發好快就到啦~

又係一個點影都咁靚嘅地方
 
 

啲樹枝好得意

真係巧令呢~

指定影相位！

不過我反而有啲出奇，竟然有陸客嚟呢度，我以為佢哋淨會去大城市添😓不過都喺係呢度，圈叔有同我喺道後溫泉一樣嘅感覺啦✌🏻️明知影人唔好睇，都係死霸個位唔肯走係咁影~大肥，唔好話我勞氣，係你太不知不覺咋😤😤

比預期中早咗行完栗林公園，咁就即刻過去高松港搭早一班船去小豆島啦~

大肥泊好車之後就去買飛，我見高松港咁多船去小豆島，所以都無喺網上訂定飛。

未夠鐘上船當然又周圍去影吓~呢隻船好大呀！不過唔係去小豆島嘅。。

到我哋上船啦，泊好車就上上層坐，好多車過去呢

架船都好大㗎

Bye Bye 高松👋🏻👋🏻

60分鐘船程就到小豆島啦，不過啲雨都由高松過到嚟。。呢隻就係我哋搭嗰隻船啦~

啲雨真係唔細㗎。。

嚟到小豆島第一站就係去橄欖公園睇風車

先食雪糕，圈姨要橄欖味，我就要另外一隻

魔虎宅急便？呢度有好多掃把俾人攞去影相㗎

見到風車啦！如果聽日有好天氣要再嚟多次！不過，圈叔你夾住掃把跳到仆咗落地。。你聽日仲會嚟嗎？

返去道之駅買手信，買咗盒橄欖朱力力，好好味！仲有醬油汽水。。。呢個就。。嚟到試吓都無妨嘅😓

下站去醬油紀念館，途經金両醬油，又入去八吓

到目的地啦，今日唔知乜事可以無料入場呢

入去行咗個圈，都係時候去做正經事啦！醬油廠當然要試醬油雪糕

其實杯雪糕都幾唔錯㗎，咸咸甜甜咁，不過一個人食就太滯啦。。大肥，下次我唔會信你買嚟兩份試呢句説話啦😤！

要食晏啦，嚟到小豆島梗係要試吓素麵啦

呢度無其他嘢揀，淨係得正常份同大份。。咁4個正常吖唔該

睇落好齋嘅素麵，沾咗醬汁食之後原來係超級好味，啲素麵彈牙㗎！


本來得20kg行李，重嘢都可免則免，連香川烏冬都唔買啦，點知啲素麵真係好好味，忍唔住要買兩包返香港！飽飽之後啲雨都無停過，所以去埋井上誠耕園，就返去酒店附近個商場行吓啦。。

返到酒店上到房，望到天使之路有人行呀！

本來想抖陣先過去嘅。。都係依家即刻去！

見到呢個展望台，最後都無上到去。。

再返到酒店，真係可以抖陣啦。。夠鐘就去食飯lu！今日呢間酒店比起其他3晚溫泉酒店，價錢都唔算貴，所以本來都無乜寄望今晚晚餐會好好味，但原來唔係平嘢無好㗎！今晚呢餐飯仲好味過最貴嗰晚祖谷呢👍🏻👍🏻👍🏻我開始覺得小豆島真係樣樣嘢都好食㗎！
 

今晚8點有樁年糕，之前未睇過架！印象中喺上次去島根住嗰間酒店都話有，但去到都無嘅。。

整好哂就搵人樁，好熱鬧呢~大肥都有份樁㗎，不過樁咗幾吓就無力lu🙈

加咗黃豆粉之後好好味👍🏻

 

又係時間食宵夜，早知今晚嗰餐咁好味就唔買咁多啦~ 

後日就返香港啦。。。