小虎浪遊記

今日就要返香港啦。。。 朝早都無乜時間行遠啲，所以淨係去咗車站附近行吓高島屋。 搭車去機場啦！ 寄行李嗰時隨口問吓地勤姐姐，既然行李無超重，可唔可以寄多一件，點知佢又真係肯喎。。不過佢都話因為今日班機好滿，怕拎到啲行李上機去無位擺，所以就俾我哋寄呢！真好~搞掂啲行李之後當然又係食嘢時間啦~今次食拉麵！ 差唔多上機啦。。 又係好快好快就到，攞埋行李就返屋企lu 10日嘅中部自駕遊咁就圓滿結束啦~除咗上到立山睇唔到雪牆之外，其他計劃咗嘅行程基本上都已經去哂，淨返嘅就等將來有機會再去啦！今次旅程辛苦哂揸車嘅虎哥同大肥啦~ 完成咗今個旅程，就要開始籌備下個旅程啦！大肥，又要辛苦你啦😁😁

今日就要返名古屋啦，籌備咗差唔多半年嘅旅行又到尾聲😩😩😩。。。 食飽飽早餐，休息一陣就要搬返啲行李落樓下等車啦！今日行程好簡單咋，由下呂出發去馬籠宿，然後就返名古屋~咁簡單嘅行程，中途當然會加啲嘢行吓啦，第一個地方就係路邊嘅一個特產店~虎媽仲買咗盒味噌添！(其實都係為咗虎媽要買味噌所以先入嚟😓) 𥚃面竟然有個大水車呀！ 繼續行程，好快又去到馬籠宿啦~   又見水車~ 本來想喺呢度慢慢行吓，但係眼見啲斜路越嚟越斜，真係有心無力。。所以留咗一陣就去下一個地方--行商場同食晏~跟住喺還車前，去埋大須商店街。。        返到今晚嘅酒店--名古屋萬寶龍飯店，大肥同虎哥就去還車啦。。辛苦哂我哋嘅戰友啦！休息一下就去食飯lu，今晚嘅目標係食燒肉！以我同大肥仲有虎哥嘅食量，當然要食放題先得啦，話哂今餐都係今個旅程最後嘅一餐晚餐，一定要食餐好嘅！所以就揀咗國產霜降和牛嗰款，仲加咗任飲添😋😋😋       啲牛肉真係好好味，比之前食嗰餐燒肉好味好多呀！食飽咁滿足嘅一餐後，係時間買吓嘢啦，去好出名嘅千里馬葯局行個圈先！啲嘢係咪真係比其他藥妝店平我就唔知，因為其實都係買少少嘢，所以無去格價，不過𥚃面全部都係普通話同廣東話就係真嘅，因為連啲店員都係講普通話㗎！ 買夠就要返去執行李啦。預備聽日返香港啦。。。

酒店無包早早，想俾錢食又full哂。。。唯有睇吓沿路去五箇山有乜嘢食啦~上咗高速無耐就見到呢個道之駅，就喺你啦！ 繼續開車出發，好快就到左五箇山啦~ 先去菅沼合掌集落，本來想泊低架車喺停車場，但係要俾500円停車費。沿途嚟嘅時候好似見得嗰幾間合掌屋咋，又唔可以停低睇一睇先俾錢，所以最後一致決定揸返轉頭搵地方停低再set GPS。就喺返轉頭無幾遠嘅地方已經有個避車處，原來呢度都望到嗰幾間合掌屋，當然角度無咁好啦~ 正當諗緊五箇山唔通就係咁嘅時候，虎哥就話應該有一個地方可以睇到多啲合掌屋㗎！所以即刻搵閃閃app啦，咁就定咗下一個目的地--相倉合掌集落，大概二十分鐘左右就到。沿路見到有好多賣豆腐嘅舖頭，虎媽不停話好想食呀。。 終於到咗目的地，呢度都係要俾500円停車，之但係呢度就抵好多，起碼一入嚟已經見到好多合掌屋吖！   行咗陣就見到呢間舖。。無錯！就係頭先虎媽好想去嘅豆腐舖！既然係咁就唔客氣啦~我哋揀咗冷豆腐同豆腐天婦羅。。 冷豆腐。。。唔。。試過就好！ 豆腐天婦羅。。雖然唔知點形容，但我就覺得好好味啦~ 食飽行夠，係時候去下一個行程--白川鄉！就喺去緊攞車嘅時候，大肥突然問我合掌屋係咪用合掌瓜砌架？😰😰大肥呀。。睇咗咁多間合掌屋，你有見到合掌瓜咩？ 上返高速，半個鐘左右就到白川鄉嘅出口 又見合掌屋 原本set左GPS直接去和田家，然後慢慢行去荻町展望台。但去到白川鄉超級多人，而我哋當然唔可以順利揸入去和田家附近啦，唯有兜去大停車場，點知大停車場又full咗。。哎。。唯有繼續行去更遠嗰個停車場啦！其實喺呢個停車場只係需要行一條樓梯上去就可以，都唔算太遠嘅，不過如果泊到大停車場，可以行橋而唔駛行樓梯感覺會好好多囉😑 一行入去，有無咁多人？！應該係有無咁逼人先啱！説好的寧靜呢？😱又熱又多人，10個人𥚃面有7個講普通話，其餘3個就講廣東話嘅，比起頭先喺五箇山完全唔同囉！所以行到去條橋度影咗幾張相就算啦！   返停車場嘅途中見到有個小水車~   原本打算上嘅展望台，因為太遠而放棄咗！行到去停車場等其他團友嗰時見到有個去展望台嘅地圖，大肥話可以試吓跟住去喎。。。 到啦到啦！成功兜到上去展望台啦~好彩頭先無行上去咋！所以話...

一大早就喺酒店食左個標榜係富山市no.1朝食嘅早餐！唔。。其實呢啲都係虛名嚟啫，食得飽咪得，反正日本無乜唔好食嘅嘢啦。 今日終於見返藍天白雲啦，連天氣報告都話黑部會好天，運氣終於返嚟啦👯👯就喺呢個時候，虎哥竟然提議今日唔搭小火車改為再戰雪牆，吓。。我兩度都想去噃🤔同車嘅大肥虎爸同虎媽就話搭小火車，虎哥就想去雪牆。。所以最後就決定，虎哥一行人去雪牆，而我哋就去搭小火車~ 由富山去黑部峽谷要一個鐘鬆啲，本來GPS顯示我哋去到嘅時間比預計搭嗰班小火車嘅時間只係早3分鐘，喺呢個情況下，除咗要靠我哋嘅戰友外，當然仲要靠大肥努力啦！果然佢哋都不負眾望，全程開住120km嘅情況下，比預定時間早左20分鐘到車站👏🏻👏🏻 泊好車即刻跑去買飛，我哋今次只係會搭到去鐘釣駅，然後行一陣就返轉頭，因為之後要趕去金沢會合其他團友。 就快夠鐘入閘啦 我地坐開放型車廂，去程係喺車頭嘅，一落月台相都無影就走咗上車😓唔緊要，返嚟先慢慢影。買飛嗰時編咗我哋坐第二卡，而全卡車廂都係得我哋4個坐，反而有窗嘅車廂就大把人，真係有錢。。。 開車啦！本來諗住坐一個鐘去鐘釣駅會有啲悶，但原來咁諗太膚淺啦！由開車一刻到落車，除咗過隧道嗰時，我係完全無停過咁影相，啲風景真係好靚㗎！(詞窮症又發作。。)             途中經過黑薙駅，如果尋日同虎哥佢哋一齊搭小火車就會喺呢度落車 架小火車有好多卡車廂㗎！ 沿途啲風景靚到呢。。        到鐘釣駅啦 呢架就係載我哋嚟嘅小火車啦！辛苦哂~ 喺呢度可以去萬年雪展望台！不過舊雪啲色有啲。。。。。 周圍行行逛逛，差唔多上車回程啦   嚟嘅時候趕住買飛，返嚟唔趕時間就可以喺車站影相啦！   坐完呢程小火車真係覺得好驚喜，初時以為一個鐘車會悶，點知沿途啲風景靚得咁緊要，完全無機會俾我恰眼訓，反而仲覺得一個鐘頭原來可以過得咁快。就算回程睇嘅嘢同嚟嗰時一樣，但換個角度又會見到唔同嘅風景。。 對於以購物作為旅行主要目的嘅人嚟講，小火車可能真係無乜好坐，但對我哋呢啲以觀光作為旅行主要目的嘅人嚟講，呢程小火車真係帶咗...