2016 上高地、立山黑部、黑部峽谷自駕10天~Day 6(宇奈月麥酒館＞高岡おとぎの森公園＞富山曼藤酒店)

今日原本係打算去搭黑部峽谷小火車嘅，點知一路食早餐一路望出街，啲雨完全無停過，仲越落越大。。食飽飽，出去親身感受吓先！嘩。。駛唔駛大得咁誇？咁大雨，唔好話坐唔到開放型車廂，就連短短十分鐘行去車站都肯肯定會濕哂。

尋日已經無得去雪牆，今日又無得去搭小火車，咁我嚟呢度有乜意思😩。。。。虎哥就喺呢個時候提議不如今日去咗高岡、富山先，聽日由富山過返嚟都好近啫。。的確富山過嚟都係一個鐘啫，而大肥又肯揸返轉頭，咁就咁決定啦！

因為虎爸好like飲啤酒同儲特別嘅酒樽酒罐，所以酒店出發第一站就係去--宇奈月麥酒館！

其實間酒館無乜嘢睇，只係有間賣店，不過虎爸都有收穫嘅~而其他團友就被對面嘅土產店吸引咗過去掃零食啦~~買好哂野，啲雨仲係無停嘅意慾，無法啦，唯有離開山區，繼續第二站--向小矢部outlet出發！

大肥，快啲衝出呢舊烏雲啦！！！

一路跟住GPS行，話要喺一個叫小杉嘅IC出口出，之後越行越覺得唔對路，因為同之前我睇過嗰個網頁啲指示唔同，呢個時候梗係搵google map大神指路啦，又好似無行錯吖，呢條路都去到噃。。再行多一陣，咦！點解GPS仲話直行，仲要去到冰見咁滯喎！即刻泊低架車喺避車處，上返outlet個網搵電話，點知個電話又同閃閃app個一樣，唉。。。唔好嘥時間啦，跟map神行啦！跟住map神指示上返IC，喺小矢部出口出，話咁快就到lu~

都話購物意慾低啦，行咗一陣已經返咗上車等其他購物意慾奇高嘅團友~然後就出發去下一站--高岡おとぎの森公園！嚟呢度就係為咗搵大肥嘅好兄弟~胖虎👏👏👏搵到，影相，走得！

之後就去Aeon Mall午餐啦~

有好好味嘅漢堡扒，好好味嘅章魚燒，同好好味嘅滑蛋蝦仁飯(大肥叔叔話要食返啲中華料理喎。。頂！)

繼續出發去富山，今晚住富山曼藤酒店，放低行李差陣電就出發去車駅行吓。

初時以為呢度會好熱鬧，原來都唔係嘅，只係覺得見多咗遊客，可能因為去立山或宇奈月都可以喺呢度搭車啦！未嚟之前已經搵到今晚嘅目標晚餐，嚟到就梗係即刻去搵吓間餐廳喺邊啦。。。説時遲那時快，間餐廳就喺呢度入面啦！

一入去就見到，就係呢間白えび亭！


嚟到當然要試下富山名物--白蝦！我就揀咗白蝦刺身丼

大肥就要白蝦天婦羅丼

啲蝦好甜呀，不愧為富山灣嘅寶石~

又係時候返酒店啦，虎媽仲買咗小籠包俾我哋做宵夜。。啱哂大肥叔叔😁而我就有雪糕~

聽日要再戰黑部峽谷小火車，希望有好天氣啦~