2016 上高地、立山黑部、黑部峽谷自駕10天~Day 7(黑部峽谷小火車＞近江町魚市場＞東茶屋街＞金沢Mystays)

一大早就喺酒店食左個標榜係富山市no.1朝食嘅早餐！唔。。其實呢啲都係虛名嚟啫，食得飽咪得，反正日本無乜唔好食嘅嘢啦。

今日終於見返藍天白雲啦，連天氣報告都話黑部會好天，運氣終於返嚟啦👯👯就喺呢個時候，虎哥竟然提議今日唔搭小火車改為再戰雪牆，吓。。我兩度都想去噃🤔同車嘅大肥虎爸同虎媽就話搭小火車，虎哥就想去雪牆。。所以最後就決定，虎哥一行人去雪牆，而我哋就去搭小火車~

由富山去黑部峽谷要一個鐘鬆啲，本來GPS顯示我哋去到嘅時間比預計搭嗰班小火車嘅時間只係早3分鐘，喺呢個情況下，除咗要靠我哋嘅戰友外，當然仲要靠大肥努力啦！果然佢哋都不負眾望，全程開住120km嘅情況下，比預定時間早左20分鐘到車站👏🏻👏🏻

泊好車即刻跑去買飛，我哋今次只係會搭到去鐘釣駅，然後行一陣就返轉頭，因為之後要趕去金沢會合其他團友。

就快夠鐘入閘啦

我地坐開放型車廂，去程係喺車頭嘅，一落月台相都無影就走咗上車😓唔緊要，返嚟先慢慢影。買飛嗰時編咗我哋坐第二卡，而全卡車廂都係得我哋4個坐，反而有窗嘅車廂就大把人，真係有錢。。。

開車啦！本來諗住坐一個鐘去鐘釣駅會有啲悶，但原來咁諗太膚淺啦！由開車一刻到落車，除咗過隧道嗰時，我係完全無停過咁影相，啲風景真係好靚㗎！(詞窮症又發作。。)

   

   

 

途中經過黑薙駅，如果尋日同虎哥佢哋一齊搭小火車就會喺呢度落車

架小火車有好多卡車廂㗎！

沿途啲風景靚到呢。。

   

 

到鐘釣駅啦

呢架就係載我哋嚟嘅小火車啦！辛苦哂~

喺呢度可以去萬年雪展望台！不過舊雪啲色有啲。。。。。

周圍行行逛逛，差唔多上車回程啦

 

嚟嘅時候趕住買飛，返嚟唔趕時間就可以喺車站影相啦！
 

坐完呢程小火車真係覺得好驚喜，初時以為一個鐘車會悶，點知沿途啲風景靚得咁緊要，完全無機會俾我恰眼訓，反而仲覺得一個鐘頭原來可以過得咁快。就算回程睇嘅嘢同嚟嗰時一樣，但換個角度又會見到唔同嘅風景。。

對於以購物作為旅行主要目的嘅人嚟講，小火車可能真係無乜好坐，但對我哋呢啲以觀光作為旅行主要目的嘅人嚟講，呢程小火車真係帶咗一段好難忘嘅旅程俾我！好慶幸今朝揀咗嚟呢度🤗

又繼續趕路啦，第二個目的地係--近江町魚市場，途經呢個道之駅。。當然要去食個午餐啦

本來去近江町魚市場之前想去兼六園㗎，不過去到又曬又熱，而且時候都唔早，入場都無乜時間行，所以就跳過咗佢啦。。直接去近江町魚市場

關東煮係我嘅至愛~呢間舖仲有螺同牛筋呀！即刻坐低試吓佢先
 

海胆同帆立貝亦係我嘅至愛~(無錯！我對食得落肚嘅嘢係比較博愛嘅😋)

 

大肥係隔離買蜜瓜，我就買橙汁

跟住出發去第二站--東茶屋街

 

嚟呢度就係為咗買烏骨雞蛋糕，即係呢間

同埋食金箔雪榚~金箔有金箔味。。。雪榚就好濃牛奶味！

 

仲要好好彩，我同大肥買完就無得賣啦。。好彩嚟得早！夠哂喉，可以返酒店放低行李抖吓，今晚住金沢Mystays。

搞掂哂就出發去車站食晚飯，今晚我要打爐！

 

飽飽就去地標影吓相

 

行過便利店買定2樽茶，今晚要嚟配虎哥買嗰條鰻魚做宵夜😁