2016 上高地、立山黑部、黑部峽谷自駕10天~Day 5(立山黑部＞海之駅蜃氣樓＞宇奈月格蘭酒店)

今日就係去立山黑部嘅大日子啦🎉🎉！！緊張到4點幾就醒咗訓唔到，點解要咁緊張？因為尋日由松本市過嚟時一路都落住雨，而且夜晚仲落左場好甘嘅狗屎呀！所以醒左第一件事就係上立山個網睇下live cam先。頂！咁乸大霧嘅，點算？大肥同我講未出太陽啫，晏啲啲霧就會散啦。。都唔知係咪真嘅😒

食飽早餐先算啦！今朝都係和式早餐，同尋日晚餐一樣，食飽就好~

由於之前計過如果9個人來回立山嘅價錢，其實都同9個人穿越立山加運2架車嘅價錢差唔多，所以一早已經喺立山官網上搵咗間汽車回送公司--三溪社。搵呢間嘅原因好簡單，因為佢係幾間𥚃面最平，而又有網友試過嘅~

出發前已經喺三溪社網頁預約好，亦都好快收到回覆確認咗個booking，同時要我提供車牌，顏色同model ，另外就係回送一次一架車只係20000円！明明官網話要24000円喎。。所以我就re-confirm下個價錢，順便通知佢哋要遲啲先提供到車資料啦。好快好快又收到回覆，真係20000円呀，夾埋可以慳返8000円呢😆

由酒店出發大約20分鐘就到扇澤駅，喺停車場兜第一個圈時淨係搵到三溪社嘅雪糕筒，再兜第二個圈就見到有個叔叔同我地揮哂手啦，跟住個叔叔指示泊好車，交低車匙，然後佢仲帶我哋去買飛，一切凖備就緒，買多個包包食就等9點鐘上第一程車--關電隧道無軌電車。

由扇澤去立山，單程要8290円

就係呢架電車帶我哋去黑部水壩啦

搭16分鐘就到，落車可以揀向右行220級樓梯上觀景台，或者向左出站。咁難得嚟到，梗係就算行到喘氣都一定要去觀下景啦！

巧靚呀~(其實我都知自己詞窮😓)
 

如果洩洪時嚟睇應該會更壯觀！

影夠就要落返去繼續行去黑部湖駅搭第二程車--黑部登山纜車！

即係呢架

落車就係黑部平駅！

跟住去大觀峰就要搭第三程車--立山架空索道！
不過太大霧啦，完全影唔到架纜車😩😩

到咗大觀峰駅，明明知道咁大霧乜都唔會影到，但都硬係要上去展望台睇下，當然。。真係乜都睇唔到。。。。。

離開大觀峰，等第四程車--立山隧道無軌電車，去今日嘅重頭戲~室堂！就喺等車嗰時。。。唔係真嘅，唔係真嘅，唔係真嘅。。。真架！雪之大谷上午終止。。。。😱😱😱還我雪牆please😭

 

崩潰都要繼續行程架，希望下午霧過天晴啦。。。

上車去室堂，一到站就見到人山人海，迫到去information 問下個姐姐有無新消息，佢竟然話今日都唔會開放。。雪牆，你俾我摸一下都好吖😭😭😭😭😭😭

好唔忿氣呀！尋日都仲有開，今日我嚟就無。。無得行都要出去踩下撻地，影個牌都好吖！

其實真係超大霧，行到出去連10米外嘅車都好虛幻咁。。

一個旅程留低嘅遺憾，就等下次再嚟先補返。。所以就即刻去搭第五程車--立山高原巴士去美女平啦！心情差到連相都唔記得影。。。唉。。

搭咗45分鐘就到美女平啦

 入到車站有人派緊啲小食，我仲以為係搭完長程車所以有件嘢俾你食吓(好明顯又樣衰咗啦😓)，食落幾好味，然後虎媽叫我去睇下係咪喺隔離間舖頭買，我先知原來頭先嗰舊係試食。。不過真係幾好味，叫立山遊記。

要搭第六程車--立山登山纜車去立山駅啦。。架車其實同喺黑部湖搭嗰架同一類，不過黑部湖嗰架就行綱索(唔知係咪咁叫)，而呢架就行路軌。

到站啦

 

係時候睇吓我哋2個戰友嚟到未，跟住頭先交車時個叔叔俾我嗰張紙，搵到戰友啦🎉，2架車由扇澤運到立山，盛惠40000円。佢地仲好老實地真係運到過嚟先收錢呀，個職員仲好好人咁送我哋一人一支飲品，隨便我哋喺汽水機揀添~

又起埗啦，虎哥話好肚餓，諗起之前睇過有個魚之駅生地可以燒海鮮，所以就向住呢個目的地出發，大約一個鐘左右就到。

有嘢食嗰啲舖頭都收哂檔啦。。唯有去附近，大約15分鐘左右車程嘅海之駅蜃氣樓！好彩。。真係好好彩。。仲有一間餐廳未收，可以開餐啦！我要食魚生丼😋

飽飽之後去超市買左啲宵夜，跟住就直接去酒店，今晚住宇奈月格蘭酒店，都係一泊兩食，放低行李就去左車站行個圈(其實無嘢行)，順便睇下聽日搭黑部峽谷小火車個站喺邊先。

今晚有自助餐呀，不過掛住食都無乜影相😆。

咁就過左第五日啦。。