2016 上高地、立山黑部、黑部峽谷自駕10天~Day 4(新穗高纜車＞松本Aeon Mall＞大町溫泉鄉)

早晨嘅上高地，好寧靜😌

喺酒店食咗早餐執好行李就出發，臨上車，買多個河童燒食吓先。

先由上高地出返去平湯接返我地嘅戰友~

然後就去搭新穗高纜車~由平湯去新穗高纜車站其實好近，半個鐘左右就到啦！之前一日係道之駅攞左折扣券，來回車錢原本2900円，依家每人可以平300円呢！

第一程只係搭普通嘢，落車即刻走去第二個站度等搭勁嘢😁有幾勁呢？據聞係日本第一架雙層纜車，不過我哋去程坐下層，回程坐上層，感覺同普通單層纜車一樣。。。。

就係呢度等雙層纜車啦~

越上越高，高到摸到個雪山頂咁。。

迎面黎嘅纜車

上到啦，2156米！

呢幾日每日都上網睇住山上嘅天氣，早兩日都好大雨大霧架，好彩今日有好天氣~

影左一陣相就開始雨飛飛啦。。。好彩都差唔多影夠，可以回程lu

 

原本今日打算去野猿溫泉，不過因為路程有啲遠，而且其他團友又好想血拼咁，所以虎哥就話去松本市行aeon mall就算，唔去野猿溫泉喎。。。。。。。。

途中去咗呢間舖食個燒肉放題

揀左最平嗰款~抵！

今晚住係大町溫泉鄉，因為呢度近扇澤駅，亦都係聽日第二個重點行程--立山黑部嘅起點，為左可以早早出發所以就住呢度嘅落葉松莊。

搵酒店時有段小插曲，Set左GPS，帶左我地去酒店後門，兜返去正門，個名又唔同我地book嗰間喎，但係明明顯示我地已經去到，點解搵唔到嘅，最後見到門口有個職員咪埋去問下啦，佢答我係呢度噃，我仲心諗係咪改左名。。。不過唔理啦，check in先！突然有人同我哋講廣東話，原來有個女仔嚟咗呢度working holiday呢。我真係未試過喺日本見到有嚟working holiday嘅香港人㗎！

搞掂哂啲行李又去影相。跟住就喺其中一張相發現。。。原來間酒店唔係改左名，只係頭嗰幾個字縮細左喺上面，所以我對唔到個名啫，真樣衰！

溫泉酒店通常都一泊兩食，今晚都唔例外，不過今晚晚餐比之前幾晚就有啲遜色啦，無所謂啦，反正日本嘢都係好味嘅，食飽飽就得！
 

今晚要早啲休息，聽日要向立山進發！