2016 上高地、立山黑部、黑部峽谷自駕10天~Day 8(相倉合掌集落＞白川鄉＞下呂彩朝樂別館)

酒店無包早早，想俾錢食又full哂。。。唯有睇吓沿路去五箇山有乜嘢食啦~上咗高速無耐就見到呢個道之駅，就喺你啦！

繼續開車出發，好快就到左五箇山啦~

先去菅沼合掌集落，本來想泊低架車喺停車場，但係要俾500円停車費。沿途嚟嘅時候好似見得嗰幾間合掌屋咋，又唔可以停低睇一睇先俾錢，所以最後一致決定揸返轉頭搵地方停低再set GPS。就喺返轉頭無幾遠嘅地方已經有個避車處，原來呢度都望到嗰幾間合掌屋，當然角度無咁好啦~

正當諗緊五箇山唔通就係咁嘅時候，虎哥就話應該有一個地方可以睇到多啲合掌屋㗎！所以即刻搵閃閃app啦，咁就定咗下一個目的地--相倉合掌集落，大概二十分鐘左右就到。沿路見到有好多賣豆腐嘅舖頭，虎媽不停話好想食呀。。

終於到咗目的地，呢度都係要俾500円停車，之但係呢度就抵好多，起碼一入嚟已經見到好多合掌屋吖！

 

行咗陣就見到呢間舖。。無錯！就係頭先虎媽好想去嘅豆腐舖！既然係咁就唔客氣啦~我哋揀咗冷豆腐同豆腐天婦羅。。

冷豆腐。。。唔。。試過就好！

豆腐天婦羅。。雖然唔知點形容，但我就覺得好好味啦~

食飽行夠，係時候去下一個行程--白川鄉！就喺去緊攞車嘅時候，大肥突然問我合掌屋係咪用合掌瓜砌架？😰😰大肥呀。。睇咗咁多間合掌屋，你有見到合掌瓜咩？

上返高速，半個鐘左右就到白川鄉嘅出口

又見合掌屋

原本set左GPS直接去和田家，然後慢慢行去荻町展望台。但去到白川鄉超級多人，而我哋當然唔可以順利揸入去和田家附近啦，唯有兜去大停車場，點知大停車場又full咗。。哎。。唯有繼續行去更遠嗰個停車場啦！其實喺呢個停車場只係需要行一條樓梯上去就可以，都唔算太遠嘅，不過如果泊到大停車場，可以行橋而唔駛行樓梯感覺會好好多囉😑

一行入去，有無咁多人？！應該係有無咁逼人先啱！説好的寧靜呢？😱又熱又多人，10個人𥚃面有7個講普通話，其餘3個就講廣東話嘅，比起頭先喺五箇山完全唔同囉！所以行到去條橋度影咗幾張相就算啦！

 

返停車場嘅途中見到有個小水車~ 

原本打算上嘅展望台，因為太遠而放棄咗！行到去停車場等其他團友嗰時見到有個去展望台嘅地圖，大肥話可以試吓跟住去喎。。。

到啦到啦！成功兜到上去展望台啦~好彩頭先無行上去咋！所以話呢，大肥唔笨嗰時其實都幾叻㗎！

   

離開白川鄉去下呂溫泉啦~經過吉野家，虎哥話好肚餓要入去食晏喎。。我好想食壽b呀😩😩最終都係坐低咗，食咗個牛肉飯加咗隻溫泉玉子再加碗豚汁！

繼續趕路，趕去下呂溫泉合掌村！嚟呢度係為咗要玩175米高嘅--森林滑梯！不過去到門口先知要俾咗入場費先再俾錢玩滑梯，所以最後就無玩到啦。。。無法啦，出發嗰日先喺網上見到，無做過功課嗎~入場又唔係人人都會玩，咁唔通我哋自己入去玩，要其他人喺車度訓覺等我哋咩，唯有唔玩啦，直接就返酒店lu~

今晚住下呂彩朝樂別館~

去到酒店見到個門口個心已經怯怯地，估唔到，原來真係。。。無電梯㗎！！！大肥同虎哥又去咗泊車喎，無錯，泊車係要去到老年咁遠，但其實酒店樓下都有車位，唔知點解唔俾我哋泊！而我就千辛萬苦咁搬咗自己個喼上去counter後，再搬大肥個喼。。。今日係第八日啦。。。我搬完2個喼後已經回唔到氣係咁坐喺度咳！沒有最慘，只有更慘。。check in時個職員同我哋講，我哋幾間房都喺2樓，不過係另一幢，而嗰幢又係無電梯嘅。。。。

搬喼搬得咁辛苦，一定要食餐好嘅先補得返呀！check in時可以選擇喺今晚晚餐額外加飛驒牛同海鮮，我哋當然全部都要啦！因為仲要補充定聽日搬喼走嘅時候消耗嘅氣力嗎！終於返到入房，抖咗陣就去溫泉街行吓，不過都無乜舖頭有開。。所以行咗陣就返去啦！

   

今晚晚餐食自助餐，而呢個就係另加嘅飛驒牛~

呢鍋就係二人份量嘅蒸海鮮~

食飽飽，休息夠就去咗按摩區，全部無料嘅，有張按摩床仲好舒服添！按夠就休息啦，聽日要返名古屋啦😩