2017 草津、伊香保、鬼怒川8天自駕遊~行程預備篇

想去咗草津温泉好耐啦，今年終於可以成行！本來打算同大肥二人行，最後虎爸虎媽虎哥虎嫂一齊加入，變咗6人行~

機票:
今次機票喺11月已經買咗lu！原先諗住3月唔係旺季，可以等吓有特價嘢先買嘅，點知就係某一日嘅下午，香港Airline推咗6月15日前出發，$750來回東京嘅優惠出嚟喎！咁啱俾小虎見到，又咁好彩禁到入去。。。咁好自然就買咗啦！

不過因為買凌晨機出發，所以貴咗200蚊呢！另外本來有3張回程要貴多200架，但後來再買嗰時又平返喎！就係咁。。。就用咗每張連稅$1,355嘅價錢買咗6張平機票啦~有特價，其實真係無乜需要坐廉航。買之前睇過雲呢嗱航空，4人出發有折，但連埋稅項行李劃位。。。都要成千七蚊一張！

HX606　01:55 - 07:05
HX609　14:55 - 19:15

酒店:
1. 木更津Grand Park Hotel Excel
2. 蘆之湖一之湯
3. 相模湖渡假村
4. 草津温泉飯店一井
5. 大江戶温泉物語 伊香保
6. 鬼怒川陽光飯店
7. 新宿格拉斯麗酒店

book好咗酒店之後再睇吓，點知喺Agoda搵到鬼怒川嗰晚平700蚊，咁當然取消咗原本喺Japanican嘅booking改去Agoda。。。點知貪字得個貧係啱架！原來Japanican係會取消哂成個booking之後，減返取消嗰晚酒店嘅價錢，再收返你個booking其他嗰幾晚嘅錢。。。所以結果係，本來平700蚊嘅酒店，最終倒蝕10蚊！經過呢次教訓，下次喺Japanican訂房一定要逐晚訂，咁取消嗰時就唔駛搞到其他幾晚啦！！！

租車:
今次喺EGL度book咗兩架車，本來租車錢唔貴，但因為3月中出發所以穩陣啲租埋雪呔。點知雪呔原來唔平，兩架車8日要俾多$2,4XX。。。不過虎哥話安全至上喎，又啱嘅。。。之前同大肥3月尾去富士山都仲積哂雪，都係穩陣啲好。。
 
行程:
其實都無乜特別架，小虎主要係想去草津同秋名山，而虎哥就話可以去富士山附近行吓，咁虎媽話未住過箱根。。。所以綜合哂所有意見就有呢個行程啦~本來唔係打算住相模湖架，不過後來發現有個相模湖燈祭，而附近又無乜酒店，所以就試吓住渡假村呢~