2017 草津、伊香保、鬼怒川8天自駕遊~Day 1

香港 > 成田空港 > 佐原水鄉 > 館山海之花 > 木更津Outlet > 東京德國村

出發啦！等咗4個月，終於都出發lu！仲有小虎大愛嘅凌晨機👍🏻👍🏻

餓餓地，又未上得機，咁就去自動販賣機睇吓有乜好食啦！大肥喺咁多樣嘢食入面揀咗蝴蝶酥。。。點知一買，上面個勾㦸住咗跌唔到落黎😡😡。。。頂！大肥話搏多次，第二盒應該唔會再㦸住喎。。再買嘅時候，第一盒真係跌咗落嚟，點知到第二盒又㦸Q住呢😤😤！熱線又收咗工，唯有影低再問返佢哋點搞啦！

大肥好唔忿氣咁再行返去部機度，轉頭真係攞多盒返嚟喎。。原來咁啱有人買，所以推到我哋嗰盒落嚟喎，咁佢又信我哋，肯俾返盒我哋喎😭😭。。真係好，如果唔係就硬蝕28蚊啦！

玩咗一輪就夠鐘上機啦！

估唔到凌晨機都有飯食噃。。。。

 

晨光~

到啦到啦啦😍😍有半年無嚟過日本啦！

 

落機第一時間去攞車，因為book車嗰時無得揀喺T2攞車，所以send咗email去問係咪要搭shuttle去攞車，Toyota覆返話只要提供flight no.就可以安排喺Terminal攞喎，咁梗係即刻俾佢~

辦好手續就去停車場

見到戰友啦😍左邊架Vitz同右邊架Sienta~

Check好架車就出發lu，今日好好天氣呀！

第一站去佐原水鄉，本來虎媽想去勝浦朝市㗎，但係驚路程太遠，去到都收市所以改咗嚟呢度，但係點解呢度比我睇電視差咁遠嘅。。。就喺呢個時候，虎哥話Toyota個職員幫佢set嗰個GPS話未到，不如跟佢哋個GPS行喎。。。

點知佢哋個GPS仲離譜。。都唔知去咗邊！最終結果係嘥咗好多時間喺呢度，搞到之後去唔切成田山！😩😩

離開佐原水鄉，又去唔切成田山，唯有直奔去館山食海鮮丼啦！中途經過千葉眺望百選嘅佐原PA展望台

嗯。。風景唔錯。。。

 

行咗好耐好耐。。終於到館山啦！

嚟館山嘅目的就係為咗食 "館山炙り海鮮丼" ！其實館山有幾間餐廳都有呢個海鮮丼食架，而今次小虎就揀咗海之花，呢間舖頭每日限量20份，之前怕嚟到無得食，所以用咗好多方法去試吓預約，點知完全無回覆。。最後上網搵吓有無啲代訂餐廳嘅平台啦，跟住就見到白金秘書呢樣野。。咁又試吓佢先~原來白金秘書好好架，填好哂啲資料，過咗2日就覆我book好lu！

就係呢set啦！

等咗一陣就有位lu，因為一早已經訂咗3 set海鮮丼，所以好快就有得食啦！海鮮丼有3層，第一層係燒海鮮，第二層係刺身，第三層係散壽司！

 

我哋之前只係訂咗3個海鮮丼，所以仲追加咗一份刺身丼

 

仲有好靚嘅太卷

仲有赤貝刺身，天婦羅盛盒，炸雞。。。。連揀飲擇食嘅虎爸都話今餐啱佢食，唔駛食三文治呀！

飽飽就過去車站影吓相~

之後就趕路去木更津outlet，呢個outlet無想像中咁大，但人唔多，都幾好行！

去outlet當然要食可麗餅😋😋

 

下一站就要去東京徳國村！

巧靚呀😍

 

小虎都留個倩影~

如果上摩天輪望落嚟應該仲靚，不過排長龍呢。。

點影都咁靚

 

 

仲有天鵝

花海

 

淨係呢條隧道都影咗好耐😅

行咗個圈就去食飯啦，今晚揀咗食蛋包飯

 

大肥嘅牛肉蛋包飯同小虎嘅漢堡扒蛋包飯~超好味！😋

 

食飽就返酒店啦！今晚住木更津Grand Park Hotel Excel，間房係細咗少少，不過都幾抵住，重點係木更津市區得呢間酒店有得book😓今日玩足一日再加凌晨機，好攰呀😅食咗少少宵夜就訓啦😴😴😴今日行咗好多路程呀～